Shillong, Risaw 20

Kawei ka dukan kaba don hajrong ka mala jong ka My Cafe Shopping Complex NEHU Shillong ha ka step jong ka 20 tarik Risaw 2026 ka la kem ding kynsan bad pynkylla dpei lut khait ïa ki jingdon jingem.

Kane ka la jia ha ka por kumba 10:45 mynstep hynrei ym pat tip na kaei kadaw ka jingkem ding bad la suba ba ka dei ka jingbthei ki tyndong lyer shet jingshet.

Ki pulit pynlip ding Fire and Emergency Services marmar ki la poi ha katei ka jaka ban pynlip ïa ka ding.

Kane ka Shopping Complex ka don ar mala bad ym pat lah ban ïoh jingkheiñ katno tylli ki dukan kiba la julor, hynrei ki dukan kiba kham shah ktah bha ha kane ka jingpluh ki dei kiba don ha ka mala kaba hajrong bad ki dukan kiba don hapoh ki la sei noh ïa ki tiar ki tiar katba ki pulit pynlip ding ki dang ïakhun ban pynlip ïa ka jingklang ka ding.

Ka jingpluh kynsan ka ding ka la bam duh ïa kumba T.20 lak tam ki mar bam kiba don hapoh kawei ka dukan.

Haba ïoh ban ïakren bad u hynmen jong u trai katei ka dukan u la ong ba ha kine ki sngi ma u bad ka kurim ki dang shu dep ban thied ïa ki jingbam ban buh hapoh katei ka dukan bad ong ba mynta ka sngi ha ka por kumba 10:45 ei ei u la ïoh ïa ka phone call bad pyntip ba ka dukan ka la pluh ding.

Ym shym la don ki nongthied hapoh katei ka jaka die jingdie ha ka por ba la kem ding. La ïathuh ba ki nongtrei jong ki dukan ki la pyrshang ban pynlip ïa ka ding da kaba pyndonkam da ki tiar pynlip ding, hynrei ki tiar kim shym la treikam.

Ka jingpluh ka la bam duh syndon ïa ka jaka die marbam jong ka Mithaas bad ka la pynjulor jur ïa ka jaka die marbam, khamtam eh ïa ka tnum jong ka, kaba bun na ki la shah pynjulor. La ngeit ba ka jingtei ba da ka dieng jong ka tnum ka la pynlong ïa ka jingsaphriang sted jong ka ding.

Ha katei ka jaka don lai tylli ki jaka bam, ka jaka buh ATM, ka dukan die kot, ka dukan khap shniuh bad katto katne kiwei pat ki jaka khaïi.