Shillong, Risaw 20
Ka ophis UDP kaba dang shu dep plie mynta la saw snem ka la long kawei na ki ophis kaba la kynjah, ka daw ka dei hadien ka jingmih noh ki 11 ngut ki MLA ka United Democratic Party (UDP).
Kane ka ophis ka dei kaba don ha Bomfyle Road, Laitumkhrah, Shil long pyrshah ïa ka Shillong College.
Ka jingkynjah kane ka ophis ka dei haba u nonglum khubor u la leit sha kane ka ophis ban leit lum khubor haba la ïoh jingtip ba kan don ka jingïalang ka UDP ha ka por 11:00 baje mynstep hynrei haduh 11:30 mynstep ym don briew ba wan namar la khang tala ïa ka khyrdop.
Haba pyrshang ban kylli na kiba peit ïa kane ka ophis kim shym la tip eiei bad haba la pynthikna na ki nongkitkam ba hakhmat ka UDP ki la pyntip ba ym shym la buh jingïalang.
Kane ka ophis kaba don lai mala kynthup ïa ka khrum kaba ïeng kali ka la kynjah namar la sah mynta satang u Bah Metbah Lyngdoh marwei kum u President bad ki nongkitkam.
Ïa kane ka ophis UDP la plie pyrda da u President
Bah Metbah Lyngdoh ha ka 11 tarik Nailur 2022 kaba dang dap mynta tang 4 snem kynthih.
Kumban shu pynkynmaw ka UDP kaba la jop haduh 12 ngut ki MLA ka la duh nyngkong ïa ki phra ngut ki MLA kata u Bah Lahkmen Rymbui, Bah Olan Suiñ, Bah Pius Shylla, Bah Balajied Synrem, Bah Synshar Kupar Lyngdoh Thabah, Bah Mayralborn Syiem, Bah Kyrmen Shylla bad Bah Mathew Beyond Kurbah kiba la dep rung sha ka BJP.
Ha ka 19 tarik Risaw 2026 ka UDP ka la duh sa ïa ki lai ngut ki MLA kata u Bah Paul Lyngdoh, Bah Renikton Lyngdoh bad Bah Nujorki Sungoh kiba la leit pyntip sha u Lamphang ba ki la mih noh na ka UDP bad leit pynïasoh noh sha ka NPP.
Ka UDP kaba dei ka seng kaba bun paid ka jingdon ki MLA ha Ïingdorbar Thawaiñ mynta ka la sah satang marwei u MLA bad ka dei ka seng kaba mad jingeh haba ka la pynïeng ïa u kyrtong ha kane ka ilekshon MP Lok Sabha shiteng samoi.
