Shillong, Jylliew 28:
Ka Hynñiewtrep Youths’ Council (HYC), Sengkmie ha ka Sngi Balang ka la leit ban tur sha shlem treikam ka Meghalaya Tourism Development Corporation Ltd (MTDC) kaba ha State Convention Centre ban pyrshah ïa ka jingpynjlan kam ïa u Chief General Manager (CGM).
“Ka seng hadien ba ka la ïoh jingtip ba ka Board of Directors (BoD) ka MTDC kan shong jingïalang mynta ka sngi, ngi la wan ha ryngkat ki dkhot jong ka seng bad ki jingthoh ‘placard’ ban pynpaw ka jingpyrshah jong ngi lada jia ba ka MTDC ka shim kano-kano ka rai ban pynjlan ïa ka kam jong u CGM, u Puranjan Das,” la ong u General Secretary ka seng, Bah Roy Kupar Synrem haba kren sha ki lad pathai khubor.
U la ong ruh ba ka seng ha ka 24 tarik u bnai ba la dep ka la phah jingthoh sha u Managing Director (MD) ka MTDC ban pynpaw ka pyrshah jur ïa ka jingthung kam kontrak ïa u Das wat hadien ba u la shongthait na ka kam.
Katkum ka jingïathuh u Bah Synrem, utei u briew u la shongthait na ka kam naduh ka 31 tarik u Lber mynta u snem hynrei ha kajuh ka sngi, ka MTDC lyngba u MD ka la pynmih ïa ka shithi thung kam ban thung kam biang ïa une u briew (kontrak) na bynta 6 bnai.
“Ka jingleh jong ka MTDC ka la pynlong ïa ngi ban ai ka jingthoh bad ban pynpaw ka jingpyrshah halor ki nongrim ba ka jingpynjlan kam ïa une u briew ka long pynban kum ka jingpynkheiñ lane ka jingpynduhnong ïa kiwei pat, la ki long kiba la trei lypa hapoh MTDC ba kin kiew kyrdan kum ki CGM bad ka lah ban pynduh lad ruh ïa ki samla ka jaidbynriew ban thep kam ha MTDC,” u la ong.
Ha kawei ka liang, u General Secretary u la ong ba u Chairman ka MTDC, Bah Sanbor Shullai ha ka jingdonlang u MD, Bah C.V.D. Diengdoh, IAS uba la khot ïakren ïa ki nongïalam ka seng u la pynshai ba ka daw ba la ai lad ïa utei u briew ban trei sa 6 bnai ka dei namar ka jingtreikam jong ka Model Code of Conduct (MCC) bad kim lah ban pynbna ïa ka jinglait kam, nalor ka dei kaba kut jong u snem mang tyngka bad ka jingdon jong ki jingïalang kaba ka Sorkar ka pynlong bad kumta donkam ïa u briew u ban bat ïa katei ka kam.
Shuh shuh u la bynrap, “Ki la kular sha ngi ba ha kaba kut jong ki 6 bnai, na ka liang ka MTDC ka la dep rai ban pynbna noh ïa ka jinglait kam na bynta ka (kam) CGM.”
