Shillong, Naitung 21
U Myntri ka tnad Communications and Development of North Eastern Region u Jyotiraditya M Scindia ha ryngkat bad u Myntri Rangbah ka Meghalaya Conrad K Sangma ha ka sngi Ba-ar, u la pyllait ïa ka Mission Golden Spice ba T.175.45 klur, ka mishon ba thmu ban kyntiew ïa ka jingpynmih, jingpynkhlaiñ ïa ka jingtylliat bad rah ïa une u jynshoh sha ki ïew ka pyrthei haba kyntiew ïa ka kamai ki nongrep.
Ïa kane ka mission ban kynthup ïa baroh ki kam naduh ka por ba rep bad ka jingai syrnot haduh ka jingtylliat, ai kyrteng bad shalan, la pyllait ha ka jingïalang ba la pynlong ha Sanchar Bhavan, New Delhi, kaba la ïashimbynta da ki nongïashim bynta na Shillong lyngba ka video conferencing.
Kane ka project ba T.175.45 klur la bei tyngka lang da ka Ministry of DoNER/NEC, Ministry of Agriculture & Farmers’ Welfare lem bad ka Sorkar Meghalaya bad ïa ka mishon yn sdang pyntreikam naduh u 2026 haduh u 2030 ha West Jaiñtia bad East Jaiñtia Hills baroh kawei, kaba pynmih ïa u shynrai Lakadong ba don ïa ka curcumin ba bun bha.
Haba ai jingkren, Jyotiraditya M Scindia u la ong, ka jingïalang ka dei ka dak jong ka jingpynlait ïa ka Mission Golden Spice kaba pyni ïa ka thong u Myntri Rangbahduh, Narendra Modi na ka bynta ka roi ka par jong ki Jylla ka thaiñ Shatei Lam-Mihngi, kaba kynthup ruh ïa ki jingtei ba kynsai ka Jylla bad ka roi ka par ha ka imlang sahlang.
“Ki Jylla ka thaiñ Shatei Lam-Mihngi kim dei shuh tang u pud ka jingpynroi hynrei kila kylla long ki jaka pdeng jong ka roi ka par ka ri India,” u la ong.
U la bynrap ba ka thong ka phaikhmat eh halor ka jingpynroi ïa ki jingtei bad ki jingpynbiang ha ka imlang sahlang kum ki ïingsah, ka koit ka khiah bad ka pule puthi bad ka kynthup ruh ïa ka jingpynroi ïa ki jinglah ba kyrpang jong kawei pa kawei ka Jylla haba nujor ha ka thaiñ, ka ri bad ka pyrthei.
U Myntri u la ban jur halor ka jingkongsan jong ka Unique Selling Proposition (USP) ki Jylla bad ka bynta jong ki kynthei ha ka imlang sahlang ki nongrep.
U Myntri u la ong ba ka jingsdang jong ka Mission Golden Spice ka dei ka prokram ban wanrah jingkylla da ka jingdon ka lad ban pynïaid ïew ha kylleng ki ri ka pyrthei bad bynrap ba kane ka prokram kan pynkupbor ïa ki nongrep kynthei, haba ban jur ïa ka jingpynkynriah ïa ka roi ka par na ka bynta ki kynthei sha ka roi ka par ba ïalam da ki kynthei ha India.
Haba ai khublei ïa ki nongrep kynthei namar ka jingtrei shitom bad synniang sha ka jingkyntiew ïa ka bor jong ka India ha ka rynsan ka pyrthei, u la pyntip ba ka jingkren u Myntri Rangbahduh shaphang u shynrai Lakadong ka Meghalaya hapoh ka G7 summit ka dei ka jingjop kaba khraw bah. U la ban jur ïa ka jingdonkam ban ïapyrshang lang da baroh ban pynthikna ïa ka jingïoh jingithuh da ka pyrthei ïa u shynrai Lakadong kaba la pynshong nongrim ha ka jingbha, ba dei hok, ba khlem khleh dawai bad ba ïai neh.
Haba ai jingkren, u Myntri Rangbah Conrad K Sangma u la ong, ki Jylla ka thaiñ Shatei Lam-Mihngi kila ïohi ïa ki jingkylla hapoh ka Ministry of DoNER hapoh ka jingpynïaid u Jyotirasitya Scindia da kaba phaikhmat sha ki bynta kum ka rep ka riang bad ki kam jngohkai.
U la bynrap ba u shynrai Lakadong u dei uba pher bha na ka bynta ka ri-lum Jaiñtia bad u la pyni ïa ka jingdon ka curcumin ba kyrpang ka bym lah ban don ha kiwei pat ki thaiñ wat hapoh Meghalaya. “Ka rukom long ka khyndew bad ka sawdong ha West Jaiñtia Hills bad East Jaiñtia Hills ka pynthikna ïa ka jingbha u shynrai Lakadong, kaba pynlong ïa u kum u mar ba dei eh na ka bynta ka mission,” u la ong.
U Myntri Rangbah u la kren ruh halor ki jingai jingmyntoi jong kane ka prokram ïa ki nongsengkam kynthei bad nongrep da ka jingkylla ka jingim ki hajar ngut namar u shynrai Lakadong bad bynrap ba ka mission ka wan ha ka por kaba dei eh naba yn ïarap shikatdei eh na ka bynta ka jingkiew bad ka roi ka par ha kane ka kam.
U la pyntip ruh ba ka Jylla kala pynthikna ïa ka jingpynmih mar na ki marrep bapher-bapher da kaba ai ïa ki kor technology bad ka jingïarap song pisa. “Ka baikheng ka don na ka bynta ki nongrep, ki SHG bad ki kynhun lyngba ka song pisa bala buh da ka Jylla, ka ban weng syndon ïa ka jingkhuslai ki nongrep halor ki kyndon ka Bank bad jingbuh bynda”.
Kiba ïadonlang ha kane ka jingïalang ki kynthup ïa u Myntri ka rep ka riang ka Jylla u Timothy Shira, ka Sukanta, Majumdar, Myntri Khynnah ka MDoNER, Secretary, MDoNER, Nivedita Shukla, Commissioner & Secretary, Meghalaya, Dr. Vijay Kumar D bad ki nongmihkhmat na ki kompani Dr. Hemanth Kumar Manikyam, Ziran India.
