Shillong, Naitung 21
Ki nongshong die madan ha Laitumkhrah ha ka sngi Ba-ar, ki la pynpaw ka jingbym sngewhun ïa ka jaka ba ka Sorkar ka la pynkhreh ban pynkynriah ïa ki, namar ba ka don kham pajih na Laitumkhrah.
Ka sorkar ka la shna ïa ki dukan na ka bynta jong ki, ha Brightwell bad Dhanketi, ha kaba kine ki nongshong die madan ki la pynpaw ba kim tip ba ka Sorkar kan pynkynriah ha katei ka jaka bad ki la dep shim ïa ka COV da ka jingpynbor ka Sorkar da kaba pyrkhat ba ka Sorkar ka ai ka jaka kaba biang ïa ki.
Haba kren sha ki lad pathai khubor ki nongdie madan ki la ïathuh, ba haba ki la leit peit ïa katei ka jaka ki lap, ba ka long kum ka sem sniang.
Ki la pynpaw ban ïatreilang sa shisien bad ka Sorkar bad kyrpad ba kan peit biang ïa ka jaka kaba dei hi ha ki thaiñ Laitumkhrah, kumba leh ïa kiba shong ha PB bad ha Civil.
Ki la pynpaw ba ki dang mut ba ka Sorkar kan ai jaka ha ïew hi namar ka jaka kaba heh.
“Kane ka jaka ba pynshna ka Sorkar na ka bynta jong ngi, ka la long kum ka jaka set mrad ym dei shuh ka jaka ban die jingdie. Ka jingshna dukan ruh ym ithuh shano kadei ka khmat bad shano kadei ka dien bad ka long beit thik kum ka jaka ri sniang,” ki la ong.
Namarkata, ki nongdie madan ki la kren da kaba shai, ba kim mon ïa kane ka jaka bad kim pdiang ïa ka rukom pynshna ka Sorkar. Ki la dawa ba ka Sorkar kadei ban pynshna beit ïa ki dukan ha ki jaka ba marjan bad ka Laitumkhrah, kumba shna ïa kiba shong ha Khyndailad bad ha Civil.
“Haba ngi ju die jingdie ha surok Laitumkhrah, kumta ka Sorkar kadei ban ai beit ha ki jaka ba marjan bad ka Laitumkhrah keiñ,” ki la bynrap.
Shuh shuh ki la ong, ba ka Sorkar ka la bthah ba baroh kidei ban mih noh na Laitumkhrah bad lada kim mih kin sa pynngat ha ka aiñ, ha kaba ki nongdie madan ki la buh ka jingkylli, ba hato ngi tuh ne? hynrei ngi bylla ïa ka hok.
“Haba ka Sorkar ka ong ban rat dyngkhong ïa ka jingkhapngiah, kadei ban rat dyngkhong shuwa ïa u drok keiñ, uba la jyllei bha ha ka Jylla,” ki la ong.
