Shillong, Naitung 21
Ka Youth Wing jong ka Voice of the People Party (VPP) ka la mih shakhmat ban kyrshan ïa ka jingïakhih kaba la ïalam da ka CJP ha New Delhi, da kaba pynpaw ba ki mat bamsap, ka jingsngew bahaïing/paralok bad ka jingtuklar saiñ pyrthei kiba la pynpaw hangtei, ki ktah ïa ka ri baroh kawei bad ym tang ïa kawei ka thaiñ.
Ha ka kyrwoh ba la pyllait ha ka Sngi Ba-ar, u President ka VPP Youth Wing, u Bah Marbud Dkhar u la ong ba ka seng ka ju ïeng barabor na ka bynta ka synshar-khadar kaba khuid, ki lad ki kabu katkum ka ‘merit’ bad ka jingkitkhlieh ha ki shlem treikam paidbah.
Katkum ka jingong ka seng, kum kine ki nongrim mynta la pynsawa ha ka jingïakhih jong ka CJP.
“Ka bamsap bad ka jingsngew bahaïing/paralok ka pyntlot ïa ki shlem treikam, ka khanglad ïa ki nongshong shnong kiba dei hok ban ïoh ïa ka lad kaba mar-katjuh, bad ka pynduh ïa ka jingshaniah ha ka synshar paidbah,” la ong ka kyrwoh.
Ka VPP Youth Wing ka la bynrap ba ki shlem treikam paidbah ki dei ban long kiba laitluid bad kiba lait na ki jingshah tuklar.
Ka seng ka la kdew ba ka jingdawa halor ka jinglong hok bad jingbym shah liang ka la nang kiew ha kylleng ka ri, bad ka la batai ïa ka kum ka jingpynpaw ïa ka jingkwah jong ki nongshong shnong ïa ka rukom treikam kaba pynshong nongrim ha ka ‘merit’ bad ym lyngba ka jingkyrshan.
Ka VPP Youth Wing ka la ong ba ka ïeng ha ryngkat ka jingïatylli bad baroh kiba dawa da kaba jai-jai ïa kine ki jingkylla.
Ka kyrwoh ka la pynpaw shuh-shuh ïa ka rekod jong ka seng ha Meghalaya, ha kaba ka la ju shimkhia ïa ki mat jong ki samla bad ïalam ruh ïa ki jingïakhih ban ïada ïa ki hok jong ki.
Ka VPP ka la ong ba kam ju rieh ban pynsawa ïa ka sur pyrshah ïa ka jingleh bymhok bad ka long kaba kloi ban sdang ïa ki jingïakhih synshar paidbah ha ka Jylla ha kano-kano ka por lada donkam.
“Kane kam dei tang ka daw jong kawei ka seng ne kawei ka jingïakhih. Ka dei ka daw jong ka ri kaba uwei-pa-uwei u nongshong shnong uba aiti ha ka hok, ka jingkhuid bad ka synshar-khadar kaba bha u dei ban kyrshan,” ong u Bah Dkhar ha ka kyrwoh.
