Shillong, Naitung 21
Ki bor synshar District ka East Khasi Hills, ki la pyrshang shuh shuh ban pynkhlaiñ ïa ka jingpyntreikam ïa ka Meghalaya Residents Safety and Security Act (MRSSA), da kaba pynïasoh lang ïa ki khlieh nongsynshar na kylleng ka District.
Haba kren sha ki lad pathai khubor u Deputy Commissioner ka EKHD, u Abhilash Baranwal ha ka sngi Ba-ar u la ong, ba ki bor district ki pynleit jingmut bha ban pynthikna ba u wei pa u wei u nongshong wai, u dei ban shah pynrung kyrteng hapoh katei ka aiñ.
U Abhilash Baranwal u la ong, ba ka jingthmu ba hakhmat eh jong ka bor synshar ka long, ban pynthikna ba baroh ki nongshong wai, khlem da kheiñ ïa ka jaidbynriew, ka niam ne ka jaka ba ki wan, kidei ban shah pynrung kyrteng hapoh katei ka aiñ.
U la ong ba ki bor District ki ju ïakren bad ki Dorbar Shnong ha ki por ba la dep, hynrei kane kadei ka jingïakynduh kaba nyngkong bad ki khlieh nongsynshar Elaka, ban pan jingkyrshan na ki ban pyntreikam ïa ka aiñ, khamtam ha ki jaka nongkyndong bad khap sor ruh kumjuh.
“Ki bor district ki la bishar bniah ruh ïa ka jingïaid shaphrang jong ki 16 tylli ki jaka ba la pyrshang ban pyntreikam ïa ka rukom pynrung kyrteng ïa ki nongshong wai online. Ïa ki shnong la pynbiang ïa ki laptop, ka internet bad ka jinghikai ban pynsuk ïa ka jingpynrung kyrteng digital,” u la ong.
U Abhilash Baranwal u la ong ba ki shnong ki la ai jingmut katto katne ki jingpynbha, kynthup ïa ki list jong ki nongshong wai, kiba lah ban download na ka bynta ban pynshisha bad ban kham suk ki pulit, ban ailad ïa ki Rangbah Dong ban buh jingthoh bad ban shna ïa ka mobile app ban pynsuk ïa ka rukom pynrung kyrteng.
U la ong ba ïa ki jingai jingmut, yn sa rah sha ka Sorkar bad ban jur, ba ka jingjop jong ka MRSSA ka shong ha ka jingïashim bynta shitrhem na kylleng ki shnong bad ki Dorbar Shnong.
U Deputy Commissioner u la bynrap, ba ïa ka jingpyntreikam la buddien lyngba ka online dashboard, katba ki magistrate kin bteng ban pynlong ïa ki prokram pynsngewthuh bad ki trai jaka bad ki nongshong wai khnang ban pynbha ïa ka jingbud ryntih.
Halor ki jingdawa na ki kynhun ban pynbor ba dei ban pyntreikam noh mardor ïa ka MRSSA, u DC u la ong ba ka Sorkar ka angnud ban pyntreikam ïa kane ka aiñ bad ki bor synshar District kin pyntreikam ïa kino-kino ki jingbthah ba ka Sorkar ka pynmih.
