Nongstoiñ, Naitung 21
Kumba ong ba ka surok Nongstoiñ-Sohpian ka dei kum kawei na ka ïit khmih jong ka sor Nongstoiñ kaba dei ruh kum nongbah jong ka District hynrei ka jingbym ïohi dak eiei haduh mynta watla dep ban pynbna ba ka mang pisa ban pyntrei ïa kane ka surok kala kot sha ki 22 klur, kala pynlong ïa ki paidbah, khamtam ki nongleit nongwan ba pyndonkam ïa kane ka surok kiba mad ïa ka jingeh ban buh jingkylli, ba lano yn ïohi noh ïa ka surok kaba bha.
Lah ban kdew hangne ba haduh mynta, ïa kane ka surok la shu ieh kumto tang da ka surok kaba rit kaba teng teng kala pynjynjar ïa ki kali kiba ïaid ba ïeng khamtam haba ki ïakynduh para kali.
“Kumba u Myntri Rangbah ka Jylla u Conrad K Sangma dalade hi ha kine ki bnai bala dep u la pynbna ba ïa ka surok na Nongstoiñ sha Sohpian yn mang T.22 klur, ngi kyntu ïa ka Sorkar lyngba ka tnad PWD ba kan leh sted ban khot ban sdang noh ïa ka jingpyntrei bad ngi kyrmen ba kane ka surok shisha kumba la pynbna kan urlong noh shen,” ong ki paidbah.
Shuh shuh halor kane ka surok, ym tang ki paidbah nongleit nongwan kiba ïai pynpaw ïa ka jingbynniaw namar ka jingbym pat ïohi dak eiei haduh mynta hynrei na ka liang u Bah Sirian Wahlang, Sordar ka shnong Nongsohpian, West Khasi Hills ruh dang shen u la pynpaw halor kane ka surok ha kaba u la ong ba kane ka surok shisha kala donkam kyrkieh ban pynheh namar ym tang ba ka dei ka surok lane ka ïit khmih jong ka District hynrei namar ka jingrit palat jong ka surok bun ki jia ki jingjia ïa tyngkhuh kali.
U la bynrap ruh ba lada ïa kane ka surok yn lah noh ban pynheh kumba la pynbna, ngeit skhem ba kan long shisha ka jingkyrkhu kaba khraw ïa ki paidbah.
Ym tang katta, halor kane ka surok bad ka jingïai ud ïai nam jong ki paidbah nongleit nongwan, ka Federation of Khasi Jaiñtia & Garo People (FKJGP) Sohpian Unit lyngba u President Bah Binsent Marngar kala mih shakhmat ban pynpaw ïa ka jingsngewkhia ha kaba ïadei bad ka jingnang pynslem ban pyntrei ïa kane ka surok.
U Bah Binsent Marngar u la ong, ka seng hi da ka jingsngewkhia ka kyntu ïa ka Sorkar kumba kala dep ban pynbna ba ka dei ban lehnoh ïa kaba donkam bad la kumno kumno dei ban ïohi noh ïa ka jingpyntrei ïa kane ka surok namar kala donkam shisha ban pynheh namar kumba long mynta na ka jingrit palat ka surok, mih bun ki jingjia aksident bad ka buh ka jingma ïa ka ïaid ka ïeng.
Shuh shuh u la ïathuh ruh ba halor kane ka surok shen na ka liang ka seng kan sa leit ban ïakynduh bad aiti ruh ïa ka jingthoh sha ka tnad PWD ban dawa ban leh eiei ïa ka surok na ka bynta ka jingmyntoi jong kiba bun balang.
