Shillong, Naitung 21
Ka Meghalaya Pradesh Congress Committee kaba kynthup ïa ki samla bad longkmie ki la leit tur hakhmat ïingsah jong u Lat ka Jylla ha ka janmiet ka sngi Ba-ar ban pynsngew ha u ban dawa hiar shuki ïa u Myntri ka tnad pule puthi ka Sorkar India u Dharmendra Pradhan halor ka jinglait tuh ki jingkylli eksam ha kine ki bnai ba la dep.
Ïa kane ka kynhun Congress la ïalam da ka Kong Joplyn Scot Shylla kaba dei ka President ka Mahila Congress, u Bah Manuel Badwar uba dei u Secretary ka MPCC bad Bah Banphira Basaiawmoit kiba la rah da ki plakad bad pyrta hiar shuki ïa u Dhar-mendra Pradhan.
Haba ïakren bad ki nongthoh khubor u Bah Manuel Badwar u la ong kane ka jingwan tur ka Congress hakhmat ka ïingsah jong u Lat namar ka dei ka ïing kaba lah ban pynsngew shaduh Delhi ba ki dawa ba u Myntri ka tnad pule puthi ka Sorkar India un hiar shuki noh.
U la ïathuh ba ka Congress ha Meghalaya ka don ryngkat lang bad ki MP kiba la leit ïakhih hakhmat ka ïingsah u Myntri Rangbahduh ka Ri u Narendra Modi hynrei ki pulit ki la rah noh ïa ki MP bad ïa u nongïalam ka Liang Pyrshah u Rahul Gandhi.
U la pynpaw ba kane ka jinghap leit ïakhih ki MP ka Congress hakhmat ka ïingsah u Modi ka dei namar ka seng BJP kaba ïalam ïa ka Sorkar kam shym la treh ban ïatai ïa ka jinglait tuh ki jingkylli eksam ha dorbar Parliament kane ka pyni ba ka BJP ka mut ban pynduh noh ïa ka hok jong ka synshar paidbah.
U la ong ruh ba ka Congress ka don ryngkat bad ki samla pule kiba la ïakhih ha Delhi kiba la shah tied shah bom namar kane ka Sorkar kam shym la sngap ïa ka jingdawa jong ki samla hynrei ka dang pynibor pynban.
U Bah Banphira Basaiawmoit uba dei u nongïalam ka seng Congress u la ong ba ka jingshngaiñ ïa ki samla kam don shuh ïa ka lawei jong ki namar ka jingbym lah ban pynïaid beit ïa ka pule puthi ha India.
“Ngi sngewpangnud ban ïohi ha ki durkhih haba ki samla ki la shah tied shah bom bad bun kiba la mynsaw haba ki leit ban dawa ïa ka hok ha Delhi,” u la ong.
Kumta u la kyntu ïa ki paidbah na Meghalaya ban ïa mih ryntih ban ïadon ryngkat bad ki samla kiba ïakhih ban wanrah ïa ka jingmyntoi ïa ka pule puthi ha ka ri India baroh kawei.
