Shillong, Jylliew 28:
Ki pulit ka ANTF jong ka East Khasi Hills ha ka janmiet jong ka Sngi Balang ki la ïoh ban kem noh ïa lai ngut ki suba nongkhaïi drok ba kynthup ïa kawei ka longkmie na Nongrim Hills.
Ki pulit na kine ki briew ki la ïoh ban kurup ïa u drok heroin uba khia kumba 114.97 gram uba la thep bad buhrieh bha ha 10 tylli ki synduk sabon.
Nalor kane, la ïoh kurup ruh ïa kawei ka scooty kaba don ïa u register number ML05-P-6944, lai tylli ki mobile phone, kawei ka passbook kaba dei jong uwei napdeng kitei lai ngut bad kawei ka pla.
Ka jingtohkit ïa kine ki briew ka dang ïaid shakhmat na ka bynta ban lap dien shuh ïa kiwei kiba donkti ha kane ka kam bad kumjuh ruh halor ka jingthmu ban pynphriang ïa u drok sha kylleng ki bynta.
