Tura, Jylliew 28:
Ki pulit ka East Garo Hills ha ka Sngi Balang ki la kem noh ïa uwei u briew uba la set ïa kawei ka khynnah hapoh ka kali lajong bad la pynngat ruh ïa u ha ki kyndon jong ka jingpyrshang ban pynïap briew.
Lah ban kdew ba ha ka janmiet jong ka Sngi Ba-Ar ha ka por kumba 7:30 eiei, ki paidbah ki la ïoh ban pyllait ïa kawei ka khynnah kaba la shah kit bad shah set ha ryngkat ka jingshah teh shah khum ki kti na kawei ka kali ha ka jaka ba la tip kum ka Rongbang Dare kaba hap hapoh ka jingpeit ka thanat Songsak ha East Garo Hills.
Ki dur-khih (video) jong ka jingïoh pyllait ïa kata ka khynnah ki la saphriang kylleng naduh hynnin ka sngi bad haduh mynta. Na ka liang ki pulit ka East Garo Hills ki la pyntip ba ïa katei ka khynnah la pyllait da ki paidbah bad la aiti ïa ka sha ki pulit.
Ha kaba ïadei bad kane ka jingjia, ki pulit ki la pynrung da ka jingujor ha thanat Williamnagar bad ka jingtohkit ka la sdang. Ki pulit ki la ong ruh ba uta u briew uba la donkti ban kit bad ban teh ban khum ïa katei ka khynnah u la shah kem noh mynta ka sngi.
Ki khubor ki ïathuh ba utei uba la shah kem u dei u samla barim jong kata ka khynnah bad ka la mih ka huri-hura hapdeng jong ki. Ka jingïoh pyllait jong ki paidbah ïa kata ka khynnah ka long hadien ba ka la pyrta ban pan jingïarap.
Ha ka por ba ki paidbah ki la ïoh pyllait ïa ka khynnah, utei u shynrang u la kam ba ka la thok la shukor ïa u bad ka la shim ruh ïa ki tiar ki tar. Hynrei katba ki paidbah ki dang ïa pyllait ïa kata ka khynnah, utei u shynrang u la ïoh ban phet krad tangba u la shah kem noh mynta ka sngi.
Ki pulit ki la ong ruh ba ki la don ki dak mong ha ki bynta jong ki kti bad ki kjat jong katei ka khynnah.
