Shillong, Jylliew:
Ki nongshong shnong jong ki thaiñ khappud kiba hap hapoh ka Block-1 jong ka West Jaiñtia Hills District hapoh ka jingïalam jong u MDC ka Barato, u Bah Aibor Shadap ha ka Lah Sngi U Blei ki la leit ban ïakynduh ïa u Myntri Rangbah ka jylla, u Conrad K Sangma ban ïakren halor ki kam khappud ha kaba ïadei bad kane ka jaka ha shwa ba ka sorkar Meghalaya bad ka sorkar Assam kin ïakren pynbeit pud hapdeng kine ar jylla jong ka wat ba ar.
Haba kren sha ki lad pathai khubor hadien ka jingïakynduh ïa u Myntri Rangbah, u Bah Aibor u la ong ba ha katei ka jingïakynduh la ïakren khamtam ha kaba ïadei bad ka Block-1 namar katei ka block naduh ka por hyndai hynthai ka dei ka shibynta jong ka jylla Meghalaya ha ka por ba la ïoh ïa ka Jowai Civil Sub Division hynrei tang hadien katto katne por pat la rah jubor ïa ka shapoh ka Mikir Hills and North Cachar Hills District.
“Na ka liang jong ngi, ngi shim ïa kane ka kabu namar ba mynta ngi la ap kumba 70 snem tam ka jingdon jong ngi shapoh ka distrik jong ka Karbi Anglong”, la ong u Bah Aibor. U Bah Aibor u la ong ba ka jingkyrpad jong u bad ki nongshong shnong ïa u Myntri Rangbah ka long ban wanrah biang ïa ka Block-1 shapoh ka jylla Meghalaya bad ka nongrim kaba ki nongshong shnong ki kwah ban wanrah biang ïa ka Block-1 shapoh Meghalaya ka dei namar ba ki nongshong shnong hapoh katei ka Block-1 ki dei tang ki pnar suda. U Bah Aibor u la ïathuh ba ki don haduh 36 tylli ki shnong kiba hap hapoh ka Elaka Labang Nongphyllud Pangam Raliang.
“Ki la im jynjar bad ki la shah pynshitom bad kim ïoh shuh ïa ka hok longbriew manbriew kumba ïoh lem kiwei ki shnong ki thaw, la pynlong ïa ki ym tang kum u shakri hynrei kum u mrad, na kata ka daw ym lah shuh ban shah ïa kane ka jingshah pynshitom ha baroh ki liang”, la ong u Bah Aibor.
Na ka liang u Chairman jong ka Hynñiewtrep Border Dispute Redressal Forum (HBDRF), u Bah Chandame Sungoh, u la ong ba ka Forum ka la pynpaw ha u Myntri Rangbah ba ki don haduh 36 tylli ki shnong Khasi-Pnar kiba donkam ban wanrah shapoh ka jylla Meghalaya.
“Na ka liang jong u Myntri Rangbah, u la ong ba kan sa wan ka Regional Committee bad ma u ryngkat bad u Myntri Rangbah ka Assam kin sa leit ban hiar sha khappud ha ryngkat ka jingmih ryntih jong ki paid nongshong shnong ban pyni ïa ka jingbun paid ka jong ngi bad ka jingkwah jong ngi ban don shapoh Meghalaya”, la ong u Bah Sungoh. U Bah Sungoh u la ïathuh ruh u Myntri Rangbah u la ong ba ka jingïakren pynbeit pud kan long katkum ki kot ki sla hynrei kaba hakhmat eh ka dei ban long katkum ka mon jong u paidbah.
U Bah Sungoh u la ong ha u Myntri Rangbah ba lada ka sorkar Assam kam mynjur ban pynphai ïa ka Block-1 shapoh ka jylla Meghalaya, um dei satia ban soi ïa ka Memorandum of Understanding(MOU) ha kane ka jingïapynbeit pud.
U Bah Sungoh u la pynpaw ruh ha u Myntri Rangbah ba ka nongrim pynbeit pud ka dei ban long na ka kaiphod synroplang hapdeng ka United Khasi Jaiñtia Hills District bad ka Mikir Hills District Council ha u snem 1957 bad pyndep pat ha u snem 1958 kaba kdew shai ba ki jaka ha Block-1 ki hap ha Meghalaya bad kumta donkam ban pynphai noh ïa ki. Katba na ka liang jong u Bah Comingson Dkhar u ba dei u Chairman ka Labang Nongphyllud Pangam Raliang Committee, u la ong ba kitei ki nongshong shnong ki la im jynjar khlem kano kano ka roi ka par ne ki jingmyntoi kiba dei ban ïoh katkum ka hok longbriew manbriew kumba ïoh lem kiwei ki shnong ki thaw bad kam shym la don ka jingtip shaphang jong ki na ka sorkar.
