Nongstoiñ, Jylliew:
Ka jingwad jong ki bahaïing ha ryngkat ka jingïarap lang ki nongshong shnong ka thaiñ Maweit ha West Khasi Hills ïa ar ngut ki rangbah kiba jah na ka jingleit khwai kat haduh mynta ka dang ïai bteng hynrei haduh mynta ym shym la lap satia.
U Bah NS Langrin, Sordar ka shnong Maweit u la ïathuh katei ka jingwad ka la poi sha ki phra sngi bad haduh mynta ki dang wad ki bahaïing hasem bad ki dang don ki nongshong shnong kiba dang leit ban ïarap wad lang.
Nangta, u la ïathuh ruh ba ha kine ki sngi ba la dep ki don na ka liang ki pulit lem bad na ka kynhun SRT kiba wan ban ïa wad lang, hynrei tang shi sngi ar sngi namar ka dang heh ka um, ka dang long lad-lad ka jynjar, ki la leit phai noh.
U la ong ruh ba ha ka jingshisha la pyrshang ban phah leit ruh sha shiliang jong ka wah da kaba phah ïaid na Shallang bad hiar sha kito ki thaiñ Nongriangna bad la phah wad baroh arliang ka wah hynrei ym shym la lap satia.
U Bah NS Langrin u la ong ba kum ka shnong bad ki paidbah nongshong shnong ka kyrpad jur ïa ki bor sorkar lane ki bor district ban ïarap lem namar ban shu ieh tang ïa u paidbah nongshong shnong ka la shem jingeh namar kin leit bylla ne leit wad briew bad wat da ki trai briew ruh ki la shem shitom ha kaba da ki taïew taïew namar bun ki nongshong shong ki bylla mynsngi bad bam pat mynmiet.
Lah ban kdew hangne ba ha ka 18 tarik u Jylliew la ïoh ban tam bad lap noh ïa ka metïap jong u Bah Shilingbest Langrin na kawei na ki jaka kumba 2 kilometer duna na katei jaka kaba ki jah. Kum ban shu pynkynmaw hangne ïa katei ka jingjia la ïoh jingtip ha ka 17 tarik u Jylliew. Kitei lai ngut ki dei kiba la tip kyrteng kum u Bah Shilingbest Langrin, Huberth Marthong bad u Bah Kmenlang Nonglang.
La ong ruh ba ki rawon kiba ïa khwai ha katei ka jaka ki la ïadon baroh 5 ngut. Ar ngut na ki, ki dei kiba la leit sah miet lypa ha ka 16 tarik u Jylliew, katba lai ngut pat ki dei kiba dang shu poi ha ka step 17 tarik jong ujuh u bnai. Ka la don ka jingsuba ba kitei lai ngut kiba la jah rngai ki la shah rong noh ha ka umsaw jong ka Wah Blei namar ba ha ka por kumba 8 baje eiei kitei lai ngut ki dang ïa ïeng khwai ha uwei u mawsiang ba heh bha harud jong ka wah, katba ar ngut kiwei pat ki la leit khwai kham pajih na katei ka jaka bad ha katei ka por la wan kynsan ka umsaw.
