Shillong, Jylliew 29:
U MLA ka UDP na West Shillong konstitwensi, Bah Paul Lyngdoh uba long kum u Myntri ha ka Sorkar Jylla u la ong ba ki paidbah ki kham peit bha ïa u masi ïatur ha madan ban ïa u masi lur ha lyngkha.
Ïa kine ki kyntien u Bah Paul u la kren ha ka jingïalang shah pynkup burom ha ka synjuk ki Shiphew Dorbar Shnong West Shillong Constituency kaba la long ha ka janmiet jong ka 29 tarik mynta u bnai ha ïingdorbar Lumdiengjri.
U Bah Paul Lyngdoh u la ong ba u masi lur u trei shitom ban lur ha lyngkha uba ai bam, hynrei ym don ba peit ïa u; hynrei ki peit ïa u masi ïa tur uba pynshongshit tang shisngi.
U la ong ka jingïakhun ïa ka ilekshon MLA ka la kut noh mynta ka sngi, kan wan noh ka jingshai nangne shakhmat ban klet shadien ïa ka jingdum.
U la ong biang ba un nym shim ïa kito kiba ïakhun pyrshah ïa u ha kane ka ilekshon kin dei ki nongshun, hynrei ki nongshun hapoh ka konstitwensi ka dei ka jingkyrni ka jingdih ïa u drok, ka jingkyrduh kam ïa ki samla.
“Ha ka jingim jong ngi ki briew ngi shem don ka por ba ngi ïoh jingkyrkhu, don ki por ba ïoh jingsneng bad ki por ba ngi mad jingeh” u la ong.
U Bah Paul u la ïathuh ba kane ka dei ka sien kaba san ba un rung ha ka Kynhun Myntri bad kan long ka jingkyrkhu ïa ka konstitwensi.
Ha kajuh ka por u la pynkynmaw mynba u dang long kum u Myntri ha ki snem ba la dep ka don ka jingïaknieh kaba jur bad ka Guwahati hynrei ha kaba khatduh ka sorkar India ka la mynjur ban buh ïa ka IIM ha Shillong.
Kumta u la ong ba ki paidbah kim ju peit ïa u masi lur uba lur ïa ka lyngkha baroh shisngi, hynrei ki paidbah ki peit ïa u masi ïatur ha jaka paidbah ban pynshongshit tang shi sngi.
