Shillong, Jylliew 29:
Ka Khun Hynñiewtrep National Awakening Movement (KHNAM) mynta ka la kdew katkum ka jinglap jong ka ha ka Office Memorandum (OM) halor ka Roster System, da kaba ong ba ka Sorkar ka la shu weng tang nalor ïa ka kyntien ‘backlog’ lane ‘ki kam ba dang sahteng ban pyndep’ hynrei ka jingshisha pat ka long ba la ïaid beit kumba long hi ha ka OM kaba mynshwa halor ka Roster System.
Ka KHNAM ka dei kaba wad bniah bad tip bha haba ïadei bad ka jingpyntreikam ïa ka Roster System bad kane ka seng saiñ pyrthei ka dei ruh kaba nud ban woh ïa ka Sorkar da kaba kdew ïa ki jinglap jong ka ha ka Office Memorandum halor ka Roster System.
Kiwei pat ki seng saiñ pyrthei kim kynthoh, bad ki don kiba pdiang ïa ka Roster System namar ki ong ba ka jingeh kam dei ha ka Roster System, hynrei ka jingeh ka dei beit ka Reservation Policy.
U Working President ka KHNAM u Bah Thomas Passah ha u kyrwoh sha ki lad pathai khubor, u la ong ba ïa kane la ïohi na ka jingmih na jingthung kam pulit ha Meghalaya Police kaba la pynshisha ba ka OM kaba thymmai jong ka 14 tarik Jylliew, 2023, ka dei hi kajuh kum ka OM kaba rim. “Ka backlog ka don beit, bad ki la shu weng ïa ka kyntien ‘backlog’ tang nalor, hynrei ki ïaid beit kumba long hi ha ka OM kaba rim,” la kynthoh u Bah Thomas.
U la ong ba ka jingpynrung ha ka OM da ka ktien ‘recruitment cycle’ lane ka jingpynrung kam kaba tyllun ha ka jaka ka ktien ‘recruitment year’ lane snem pynrung kam jong ka State Reservation Policy kam dei kaba shu jia ryngkhat (accidental) hynrei ka dei kaba da mut khnang (intentional) namarba ka Sorkar ka kwah ban pynïap noh (bypass/violate) ïa ka Para 2 jong ka State Reservation Policy, 1972 kaba dei ban pynduh noh ne pynkut noh ïa ki kam kiba sahteng ban thep kam ha ka snem pynrung kam (recruitment year) kaba bud.
U Bah Thomas u la ong ruh ba namarba ha ka OM kaba thymmai ym don shuh ka kyntien ‘snem’ bad la mih da ka ktien ‘cycle’ ki kam ba sah (backlog) kin nym duh ne ïap shuh bad kin don beit namarba ka dei ka roster kaba phai shadien (retrospective roster) kaba sdang naduh u Kyllalyngkot, 1972.
“Lada dei ba ka Sorkar ka pdiang ban pynïaid da ka roster kaba shakhmat (prospective roster) naduh u Jymmang 2022, te yn ym don eiei kata ka ‘backlog’ lane ki kam ba sahteng ban pyndap, wat lada ki roster account ki ïaid katkum ka recruitment cycle. Hynrei namarba ka Sorkar ha ka OM kaba thymmai mynta ka pdiang ïa ka ‘retrospective roster’ hap pynïaid beit ïa ki roster account katkum u snem pynrung kam,” la ong u Bah Thomas.
Shuh shuh ka KHNAM ka la ong ba mynta don tang ar tylli ki lynti (options) ban leh, kita, kaba nyngkong ka long ban pdiang da ka Prospective roster system khnang ba ki roster account kin sdang na u Jymmang 2022 ban ym don shuh kita ki kam kiba dang sahteng ban pyndap (backlogs), lane ka ba-ar ka long ban bteng ïa ka Retrospective roster system kaba ki roster accounts ki sdang na u Kyllalyngkot 1972, tangba dei ban weng noh ïa ka ktien ‘recruitment cycle’ bad buh bujli da ka ktien ‘recruitment year’ ha ka OM kaba thymmai.
