Shillong, Jylliew 29:
Ki nongdie doh masi hapoh ka lama jong ka Butchers Association of Meghalaya (BAM) ki la rai ban sdang biang ka jingdie dohmasi naduh ka 3 tarik u Naitung.
U President ka BAM, Bah Esron Marweiñ, u la pyntip ba ïa kane ka rai la shim hadien ka jingshong jingïalang hapdeng ki nongdie doh masi kiba na Ïewduh, Mawlai bad kiwei ki bynta jong ka sor bad khapsor.
U Bah Marweiñ u la ong ba ki nongdie dohmasi ki la rai ban plie biang ïa la ki dukan hadien ba ka sorkar jylla dang shen ka la ong ba ïa ka jingpang ki masi ba la tip kum ka Lumpy Skin Disease (LSD) la lah ban tehlakam hapoh ka jylla.
Na ka liang ka BAM ka la kyntu ruh ïa ki paidbah nongshong shnong ba kin sdang biang ban thied ïa ka dohmasi khnang ba kum ki nongdie doh ruh kin nym ïap ja ne duhnong.
Lah ban pynkynmaw ba ha ka 25 tarik mynta u bnai, ka sorkar jylla ka la pyntip ba ki la don haduh 8177 tylli ki masi kiba la shah ktah na katei ka jingpang naduh ba ka la saphriang hapoh ka jylla.
Shuh shuh na ka liang jong u Secretary ka tnat Animal Husbandry and Veterinary u la pyntip ba napdeng kito ki masi kiba la shah ktah ha katei ka jingpang, haduh 5884 tylli ki la koit, 101 tylli ki la ïap bad 2192 ki dang don ïa ka jingpang. Haduh mynta la dep ban ai injek ïa ki 28595 tylli ki masi hapoh ka jylla.
Na ka liang ka sorkar ka la pyntip ruh ba palat ïa ka 70% na ki masi kiba la shah ktah, ki la ïoh jingkoit namar ka jingai jingsumar ha ka por kaba biang.
Dei naduh ka 23 tarik Jylliew ba ki nongdie doh masi jong ka jylla ki la khang noh ïa ki dukan namar ka jingleh artatien jong ki paidbah ban thied doh hadien ka jingpaw pyrthei jong katei ka jingpang.
