Shillong, Jylliew:
Ki nongïew bad ki nongleit nongwan ha Ïewduh ki la ïaknieh shondur bad u Pyllaitmitre Lypon uba la tip ruh kum u Sam uba dei u tyngshop ka phlim ‘Khohwah Nongsor’, ka Aba Nongkhlaw bad ka Rishisha Mynsong kum ki puron ha ka por ba ki leit pan jingkyrshan ha Stand Taxi Mawngap, Mawjrong, Laitlyngkot, Basa Tympew bad Basa Soh kaba long mynta ka sngi ka 27 tarik Jylliew, 2023 kum shimbynta ban pan jingkyrshan na ki paidbah ba kin wan peit ïa kane ka phlim ‘Khohwah Nongsor’ ha Bijou Cinema naduh 30 tarik Jylliew, 2033 man ka sngi naduh ka por 11:30 mynstep, 2:00 baje nohphai sngi, 5 baje janmiet bad 7 baje mynmiet.
Hashwa ba ki paidbah kin ïoh khublei kti bad shondur bad u Sam, ka Aba bad Rishisha la pynlong ka prokram kaba lyngkot ha Stand Taxi Mawngap, Ïewduh da kaba ai jingkren da u Bahdeng Dohtdong uba dei u nongpeit ïa ka Ïewduh, Rishisha Mynsong ka puron phlim Khasi, Pyllaitmitre Lypon ba la pynïaid da u Bah Wanbet Shangpliang uba dei u nonghikai shad ka Wanz Dance Evolution, Mawlai ha jingïadonlang ki nongñiah taksi, ki nongdie tympew, ki nongdie soh, die jhur.
Ban pynshongshit ïa ki nongïew la ai jingshad da ki nongshad ka Wanz Dance Evolution kiba la shad da jingrwai ‘Da Ki Sur bad Shiteng Lynti’ jong ka phlim Khohwah Nongsor.
Na ka liang u Sam, Aba, Rishisha bad Bahdeng Dohtdong haba ki ai jingkren ha kane ka jingïalang kaba lyngkot hakhmat ki nongïew, ki la kyrpad ïa ki paidbah ba kin wan ban peit ïa ka phlim Khohwah Nongsor ha Bijou cinema kum shibynta ban ai mynsiem ïa ki nongpynmih phlim bad ki nongak namar ka long ka jingkyntiew para Khasi.
Na ka liang ki paidbah kiba la wan sngap ïa kane ka prokram kaba lyngkot ki la kular ban wan ai jingkyrshan ïa kane ka phlim ha Bijou Cinema.
Hadien ba la kut ka jingshad ki paidbah ki la leit ban ai khublei ïa kine ki tyngshop bad ki puron bad shondur lang.
