Shillong, Jylliew 29:
U Myntri ka tnat pule puthi ka Jylla, u Rakkam A Sangma, u la pyntip ba ki don haduh palat 18,000 ngut ki nonghikai hapoh Meghalaya ki bym pat shym la pyntbit satia.
Ha kaba ïadei bad kane, u Myntri u la ong ba ka sorkar jylla kan sa kyrpad ïa ka Indira Gandhi National Open University (IGNOU) bad National Institute of Open Schooling (NIOS) ban pynbiang ka jingai jinghikai sha kine ki nonghikai ki bym pat pyntbit.
U Myntri u la pyntip ruh ba u Myntri Rangbah u Conrad Sangma un sa ïalam ïa ka kynhun sha Delhi ban ïakynduh ïa u Myntri ka Sorkar Kmie ba khmih ïa ka tnat Human Resources Development.
Ha kane ka jingïalang u Myntri Rangbah un sa ïakren ruh ïa ka mat bad u Myntri ka Sorkar Kmie khnang ba ka Indira Gandhi National Open University (IGNOU) bad ka National Institute of Open Schooling (NIOS) kin lah ban ai jinghikai pyntbit ïa ki nonghikai.
“Palat ïa ka 18,000 ngut ki nonghikai kim pat dei kiba la pyntbit, ngin sa ïakren ïa kane ka kam bad u Myntri ka Human Resources Development ban kyrpad ïa ka NIOS bad IGNOU ban pyntbit ïa ki nonghikai ki jong ngi,” la ong u Rakkam.
U Myntri ka tnat Pule Puthi ha ka sngi Balang jong ka taïew u la pynlong ïa ka jingïalang khmih bniah ha ka jingïadon lang u Advisor ka tnat pule u Bah HM Shangpliang nalor kiwei pat ki ophisar jong kane tnat.
