Shillong, Jylliew 29:
Uwei u samla u la shah kem noh ha ki pulit hadien ka jingthwet ha kaba ïadei bad ka jingpynjulor ïa ki kor buh bad sei pisa lane ki Automated Teller Machine (ATM) ha kylleng ki jaka.
Ha u kyrwoh khubor ha ka Sngi Palei, ki pulit ki khlem ïathuh satia ïa ka kyrteng jong utei uba la shah kem. Hynrei, ki la ïathuh ba utei uba la shah kem ha ka Sngi Balang u la donkti ban pynjulor ïa saw tylli ki kor ATM ha Madanrting, Laitumkhrah, Rynjah bad Laban.
La ong ruh ba ka jingduh na kane ka jingpynjulor ïa ki kor ATM ka la kot palat ïa ka T. 10 lak.
Ka jingkem ïa utei u briew ka long da ki pulit na ka thanat Rynjah hapoh ka jingïalam ka DSP (Law & Order), ka Jyoti Wahlang, MPS bad u ASP Dewansh Pandey, IPS.
Na ka liang ki pulit ki la ïoh ruh ban kurup ïa ki jaiñ, pla, bad ka shatri ba utei u briew u la pyndonkam ha ka por ba u la pynjulor ïa kitei ki kor ATM.
La kem ïa utei u briew ha kaba ïadei bad ka jingujor ba la pynrung ha thanat Madanrting (No. 60(6)2023) hapoh ki kyndon 427/380 IPC bad 3(2) (e) PDPP Act bad la phah ïa u sha ïingbishar.
Ka jingtohkit ka dang ïaid ban lap la ki la donkti lang ne em sa kiwei pat bad ban tip ha kano ka rukom ki la pynjulor ïa ki ATM.
Ki pulit ki la ong ba ki la don kumba 9 tylli ki jingjia kiba ïadei bad ka jingpynjulor ïa ki kor ATM bad ïa ki jingujor la pynrung ha thanat Rynjah, Madanrting, Laitumkhrah.
Ka jingpynjulor ïa kine ki kor ATM ka long na ka bynta ban lute pisa bad la leh ïa kine ki kam be-aiñ ha ka por ba dang ïaid ki kynta pynlip bording, la ong ki pulit.
