Shillong, Jylliew:
Ka Khasi Hills Autonomous District Council (KHADC) ka la ïoh pdiang ïa ka song pisa kaba palat T.12.37 klur kum ka bhah na ka khajna kali jong u snem 2022-2023.
Haba jubab ïa ka jingkylli ba la wanrah da u MDC ka Mawkynrew Bah Martle N Mukhim, u CEM ka KHADC Bah Pynïaid Sing Syiem u la ong ba ka song pisa baroh ba la mang ka long T.14 klur bad ka pisa ba la ïoh pdiang ka long T.12.37 klur, bad kaba dang sah ka long T.1.65 klur.
U Bah Pynïaid u la pyntip ruh ba ka Council ka la ïoh pdiang T.2.04 klur ha ka snem mang tyngka 2021-2022 bad T.3.45 klur jong u snem 2020-2021.
U la pyntip ruh ba ka KHADC ka la ïoh 60% ka bhah khajna ba la lum da ka Sorkar Jylla na ki kali.
Nalor kane, u CEM u la pynpaw ba ym don jingtip satia halor ka khajna ba la ïoh lum baroh lang na ki kali namar ïa ka jingkheiñ jingdiah halor kane, la leh hi da ka Sorkar Jylla, katba ka Council pat ka shu pdiang beit ïa kaei kaba la ai kum ka bhah na kane ka khajna.
