Shillong, Jylliew 29:
Ka jingpule ïa ki kot ki sla ka ïarap ïa ngi ha kiba bun ki liang bad ka long ruh ka dawai ïa ka jingmut jingpyrkhat bad khamtam eh lada ki kot ki dei kiba la thoh da ki ’riew shemphang.
I mei-ieid Sweetymon Rynjah i dei iwei na ki nongthoh kot ba paw jong ka jylla, i ba la noh synñiang shibun eh sha ka imlang ka sahlang lyngba ki jingthoh jingtar jong i bad i dei ruh i ba la ïohpdiang ïa ka khusnam Tirot Sing Awards na ka sorkar jylla.
Kumta kum ka dak ka jingsngewnguh ïa u synñiang u bynhei ba i la noh sha u sup u thiar jong ka jingthoh kot, ka Seng Kynthei Mawkhar Welfare Organisation (SKMWO) ha ka sngi Palei ka la pynkup burom ïa i mei-ieid Sweetymon Rynjah i ba la don 89 snem ka rta.
Ïa katei ka jingïalang pynkupburom la pynlong ha Community Hall jong ka Mawkhar ha kaba la ïoh ïa ka jingkren pdiang sngewbha na ka Kong S.N War kaba dei ka President jong ka Seng Kynthei Mawkhar Welfare Organisation, ka jingkren na u Bah A. Tariang uba dei u Rangbah Shnong ka Mawkhar bad ka jingkren ai khublei na ka Kong M Nongrum kaba dei ka Vice President ka seng.
Haba ai jingkren ha katei ka sngi, i mei-ieid Sweetymon i la pynpaw ïa ka jingkmen kaba khraw ba i la ïoh ban shah pynkupburom ha katei ka sngi bad i la ai khublei ïa ka seng kynthei baroh kawei kaba la kynmaw ïa i bad ïa ka kam kaba i la leh.
“Nga ai khublei ïa phi bad nga da sngewnguh shisha ïa ka jingïakmen mynsiem lang bad nga ha kum kine kiei kiei hynrei ha phi ki khun samla kynthei shynrang jong ka dong ka shnong jong ngi, nga buh ïa ka jingkyntu ba ngin ïa wad ïa kiei kiei ym tang ki ban pynsngewbha bad pynlut por hynrei ba ngin ïa tei lang ruh lyngba ka jingtrei shitom, ka jingdonsap ka jong ngi ïa kiei kiei ki ban synñiang sha ka jinglong Jaitbynriew long lang jong u paid Khasi baïar”, la ong i mei-ieid Sweetymon.
Shuh shuh i mei-ieid Sweetymon i la ong ba kum ki briew ki don ka kam bad ka ram ban siew bad kata kam dei da ka spah, ka hajar ne da ka nam ka burom hynrei ka don ruh ka kamram kaba dei ban ai hakhmat jong u Blei kaei kaba ki la leh ha ka jingim ka jong ki ban long ka jingbha ïa ka ri bad ha satlak jong ka pyrthei hi baroh kawei.
“Ngi long ki paid Khasi baïar, ngi don shibun kiei kiei kiba teh song ïa ngi bad to ngin ïa wad ïa kiei ki kyndon jingteh kiba u longshwa u la maitphang ha ka juk kaba u im bad ki jingeh kiba u ïakynduh lehse, kiba ym ïadei bad kane ka juk kaba mynta kaba ki jingshyrkhei jong ki jingmlien kiba sniew ki synshar ïa ki khun samla”, la ong i mei-ieid Sweetymon.
Shuh shuh i mei-ieid Sweetymon i la kyrpad ruh ïa ki khynnah samla ba kin ïa kiar na ki jingmlien bad ki jingpynshoi kiba sniew khnang ban lait na kiei kiei bad ban suk ka jingim bad ba ka pyrthei kan dap da ka jingbha.
“U Khasi hi, u don la ka jong ka sap ka phong, u don la ka jong ka jingud ka snam, u don la ka jong ka buit ka bor, to ngin ïai pynneh ïa kine kiei kiei kiba bha ki jong ngi”, la ong i mei-ieid Sweetymon.
I mei-ieid Sweetymon i la ong ruh ba ka dong Mawkhar ka dei ka jabieng jong ka Ri Khasi naduh hyndai hynthai bad i la ai ka jingkhublei bad ka jingkitbok ïa ka seng kynthei, ka dorbar shnong bad ïa ki nongkitkam ba kin ïoh ka buit ka bor ba kin pynïaid ïa ki kam jong ka shnong baroh kawei.
Na ka liang u Bah A.Tariang, u la ong ba ki synñiang ba i mei-ieid Sweetymon i la noh ha ka thoh ka tar jong u Khasi ki long kiei kiei kiba la ïar haduh katta katta bad u la ong ba i mei-ieid Sweetymon i long kum i nongaijingmut jong ka shnong bad haba ka seng kynthei jong ka shnong ka donkam eiei ka ju leit ban kynduh ïa i.
“Kum u Rangbah Shnong nga lap ba i long i briew i ba trei shitom haduh katta katta bad ki synñiang kiba i la noh ha ka thoh ka tar jong u Khasi ki long kiei kiei kiba la ïar haduh katta katta”, la ong u Bah A. Tariang.
Shuh shuh u Bah A. Tariang u la ong ba i mei-ieid Sweetymon i long i briew ba ïar ka jingmut jingpyrkhat haduh katta katta bad u la ong ba i long iwei na ki nongshong shnong i ba kordor haduh katta katta.
