Shillong, Jylliew 29:
Namar ka jingïashim bynta bad ka jingpyndonkam jong ki seng saiñ pyrthei lane ki kmie ki kpa ïa ki khynnah rit ha ka kam ban ïalap ilekshon bad khamtam kito kiba dang don hapoh ka 14 snem shapoh, ka Hynñiewtrep Youths’ Council (HYC) Sohïong Circle ha ka Sngi Balang ka la leit ban ai da ka jingthoh ha ka Deputy Commissioner (DC) ka East Khasi Hills District, ka Kong RM Kurbah ban khanglad bad ban ym shah ïa kane ka jingïashimbynta jong ki khynnah rit ha ki kam ilekshon.
Haba kren sha ki lad pathai khubor, u Bah Purningstar Shabong, President HYC Sohïong Circle, u la ong ba kaba sngewkhia haduh katta katta ka long ba ka jingpyndonkam jong ki seng saiñ pyrthei lane ka jingpyndonkam jong ki kmie ki kpa bad kiwei kiwei ïa ki khynnah rit ha ka ilekshon ka long kaei kaei kaba wanrah ka jingjia kaba sngewsih haduh katta katta.
“Ngi wan kynduh ïa ka Deputy Commissioner halor ka nongrim ba ka jingïashim bynta jong ki khynnah rit ha kaba ïadei bad ka ilekshon khamtam eh hapoh Sohïong kaba ngi lah ïakren”, la ong u Bah Shabong.
U Bah Shabong u la ong ba kane ka jingïashimbynta jong ki khynnah rit ka wanrah ïa ka jingsngewsih namar ki ju don ki jingmynsaw ha ka por ïaid paidbah ban ïalap ilekson. Kumta na ka liang ka seng ka la wan ïakynduh ïa ka DC ba kan ïakren bad ba kan phah da ka jingthoh sha ka Election Commission of India ba kam dei satia ban shah ïa ki khynnah rit ba kin ïashimbynta ha ki kam ilekshon.
“Ngi la wan ban kynduh ïa ka DC ban ïakren bad ban buh da ka jingthoh ba kan pynmih bad ba kan ïakren ha kaba ïadei bad ka Election Commission ba ïa ki khynnah rit ym dei ban shah ba kin ïashimbynta ha ki kam ilekshon khamtam ha ki rally lane kino kino ki jingïalang kiba ïadei bad ki kam ilekshon”, la ong u Bah Shabong.
Shuh shuh u Bah Shabong u la ong ruh ba ka seng ka jingpynshong nongrim ïa kane ka jingujor ka dei halor ka shithi ba la thoh da u shongknor ka National Commission for Protection of Child Rights (NCPCR) ha u snem 2017 sha ka Election Commission of India ban bthah ïa ki seng saiñ pyrthei ba kim dei ban ailad ne ban pynïashim bynta da ki khynnah rit ha ka kam ilekshon.
U Bah Shabong u la ong ba ka seng ka la kyntu ïa ka DC ba kan shimkhia halor kane ka kam ba nangne shakhmat ym dei shuh ban pyndonkam ïa ki khynnah rit ha ki kam ilekshon khamtam ha ka por ba ïaleh shongshit namar bunsien ka ju wanrah ka jingmynsaw bad ka jingsngewsih.
“Na ka liang ka DC ka la ong ba kan sa shimkhia halor kane ka jingujor ka jong ngi bad ka Election Commission bad ngi kyrmen skhem ba na ka liang ka DC kan shimkhia bad na ka liang ka Election Commission ruh kan nym shah shuh ban pyndonkam ïa ki khynnah rit ha ki kam ilekshon”, la ong u Bah Shabong.
