Shillong, Jylliew 30:
Ka United Democratic Party (UDP) ha ka Sngi Thohdieng ka la pynbna ba kan sa pynlong ïa ka ‘General Council’ ban jied ïa ki nongkitkam bathymmai jong ka seng ha ka 29 tarik jong u bnai ban wan.
“Ngin leit sha ka ‘General Council’ ka ban long ha ka 29 tarik u bnai ban wan namar kumba phi tip ba ka smaoi treikam jong ka UDP ha ka jingshisha ka la kut,” la ong u General Secretary ka seng, Dr. Jemino Mawthoh haba kren sha ki lad pathai khubor hadien ka jingïalang Central Executive Committee (CEC) jong ka seng.
U la ong ba ka jingïalang ka la ïakren ruh halor katto-katne ki bynta kiba la tyrwa ban wanrah jingkylla haba phai sha ka riti treikam jong ka seng hashuwa ban ïoh ïa ka ‘General Council’.
“Ngi la jied ïa ki nongkitkam ha u snem 2019 bad ka samoi treikam ka long kumba 3 snem, hynrei na ka daw u COVID bad ka ilekshon, ngi la hap ban pynkynriah noh ïa kane bad ka jingjied ïa ki nongkitkam kan long ha ka 29 tarik u bnai ban wan. Ki la don ruh katto-katne ki jingpynkylla haba ïadei bad ka riti treikam ka seng,” u la ong.
Halor ka ‘General Council’, u la pynsngew ba ka seng ka la jied ïa ki dkhot ki ban don ha ka ‘Nomination Committee’ naba kumba ju long, ka seng shuwa ban leit sha ka ‘General Council’ ne ka ilekshon, ka ju jied ïa ki dkhot ban don ha ka ‘Nomination Committee’.
“Kine ki dkhot ki ban khmih ha ka ban jied ïa ki nongkitkam jong ka kynhun treikam bathymmai ha ka 29 tarik, ki kynthup ïa ki President, Secretary jong baroh ki distrik, President bad Secretary ka Youth Wing, Women’s Wing, Farmer’s Wing bad kumba 8 ngut ki dkhot ka seng – President ka seng (Ex-Officio), General Secretary (Ex-Officio) bad 6 ngut kiwei pat ba kynthup ïa u Bah Renikton Lyngdoh Tongkhar, Bah P.T. Sawkmie, Bah Mayralborn Syiem, Bah Nujorki Sungoh, bad 2 ngut na Ri-Lum Garo,” la ong u General Secretary.
