Jowai, Jylliew 30:
Ka Jaiñtia Student Movement (JSM) ka la ai por shi taïew ïa ki bor distrik ka West Jaiñtia Hills District ban weng ïa ka khyrdop lum khajna (Entry Tax Gate) ha ka shnong Khanduli, West Jaiñtia Hills District.
Ka JSM ka la byrthen ruh ban pynlong da ka jingïakhih kaba tyngeh lada katei ka khyrdop kaba la pynïeng da ka Karbi Anglong Autonomous Council (KAAC) ym lah ban weng hapoh ka 10 tarik u Naitung.
U President ka JSM, Western Region, Bah N. Ribok Biam u la ong, la 2 bnai kynthih, ka Sorkar kam lah ban weng ïa katei ka khyrdop jong ka KAAC bad ka Sorkar Assam kan sa kam trai ïa ka shnong Khanduli na ka daw ka jingtlot jong ka Sorkar.
Ha ka dorkhas ba la aiti ha u Deputy Commissioner jong ka West Jaiñtia Hills District, u Bah Batlang S. Sohliya, ka JSM ka la ong ba u pud u sam jong ka distrik u kut haduh Zero Point, khappud ka Namdong C&RD Block bad Nartiang Police Station ba hap hapoh ka West Jaiñtia Hills District.
Ka JSM ka la ong ba ka Khanduli ka hap hapoh ka Namdong C&RD Block, jong ka West Jaiñtia Hills District bad hapoh ka jingpeit jingkhmih jong ka Jaiñtia Hills Autonomous District Council.
Kum ban shu pynkynmaw ha ka 15 tarik Ïaïong, ka KAAC ka la pynïeng ïa katei ka khyrdop ha ka jaka kaba tip kum ka Moosakia, Khanduli ba hap ha West Jaiñtia Hills District.
Ki nongïalam shnong jong ka Khanduli ryngkat ki kynhun sengbhalang bapher-bapher ba kynthup ka JSM ki la pyrshah jur ïa ka jingpynïeng ïa katei ka khyrdop da ka KAAC ha Khanduli.
