Shillong Jylliew:
Ka Khasi Students’ Union (KSU) Laban Circle ha ka Sngi Palei ka la leit ban ïakynduh ïa ki nongpynïaid jong ka Longkmie Gas Agency kaba don ha Laban Last Stop ban ïakren halor ka jingïoh duna ki paidbah ïa ki tyndong lyer shet jingshet (LPG Cylinder). Ha kane ka jingleit ïakynduh ïa ki nongpynïaid ka Longkmie Gas Agency la lamkhmat da u President samla Reuben Najiar bad u samla Jason Laloo General Secretary lem bad ki dkhot.
Na ka liang jong ka KSU ka la pynsngew sha kane ka Agency ïa ki jingujor ba ka la ïoh na ki paidbah ka thaiñ Laban ha kaba ïadei bad ka jingïoh duna ïa ki tyndong lyer ha ka shisnem kata tang 10 tylli kaba ki Gas Agency ki dei ban pynbiang ym duna ïa ka 12 tylli ki tyndong ha ka shi snem.
Ka KSU ka la pyntip ba ha ka jingleit khynra ha ki bnai ba la dep ïa ki dukan die sha halor ka khuid ka suba, kata ha ka 13 tarik Jymmang 2023 la lap ruh ba ki dukan bam ki ju pyndonkam da ki tyndong lyer kiba dei ban shet ban tiew ha ki ïing bad kane ka long pyrshah katkum ka aiñ.
Ka Longkmie Gas Agency ka la pynsngew ïa ki jingeh kaba ki ïakynduh bad ka la kular ban pynbit pynbiang ïa ki jingduna kaba ki paidbah ki shem bad ka la pynshai ba kam don kano kano ka jingdie tuh ïa ki tyndong lyer. Namarkata, ka KSU ka la maham tyngeh ïa ka Longkmie Gas Agency ba kam dei ban pynduna ïa ki tyndong lyer kaba dei ban poi sha ki longïing jong ki paidbah nongshong shnong ka Laban.
