Shillong, Jylliew 30:
U Myntri Korbar Ri, u Amit Shah, ha ka Sngi Thohdieng u la ai jingmynjur ïa ka jingpyllait pisa kaba haduh T. 6,194.40 klur sha 19 tylli ki sorkar jylla hapoh ka State Disaster Response Fund (SDRF).
Kane ka pisa kaba T. 6,194.40 klur ka kynthup ïa ka T. 1,209.60 klur kum ka bhah ka bynta jong ka Sorkar Pdeng na ka bynta ka State Disaster Response Fund (SDRF) jong ki saw tylli ki jylla kiba kynthup ïa ka Chhattisgarh, Meghalaya, Telangana, Uttar Pradesh na ka bynta u snem 2022-23.
Sa kawei pat ka bynta ka long T. 4,984.80 klur jong ki 15 tylli ki jylla – Andhra Pradesh, Arunachal Pradesh, Assam, Bihar, Goa, Haryana, Himachal Pradesh, Kerala, Maharashtra, Manipur, Meghalaya, Odisha, Punjab, Tamil Nadu, Tripura – na ka bynta u snem 2023-24. Ka jingpyllait ïa kane ka pisa kan kyrshan ïa ki jylla ba kin ai jingïarap ha ka aïom lyiur kaba dang ïaid mynta.
Ka Sorkar Pdeng, hapoh ka jingïalam jong u Myntri Rangbahduh, u Narendra Modi, ka la mynjur lypa ïa ka jingpyllait pisa kaba T. 3,649.40 klur kum ka bynta jong ka Sorkar Pdeng jong ka SDRF sha 9 tylli ki Jylla ha u snem 2023-24. Katkum ki jingai jingmut ka 15th Finance Commission, ka Sorkar Pdeng ka la buh T. 1,28,122.40 klur na ka bynta ka SDRF na ka bynta ki snem 2021-22 haduh 2025-26.
