Shillong, Jylliew 30:
Ha ka sien kaba nyngkong eh ha ka jingïaid shaphrang ka rukom sumar ha ki thaiñ nongkyndong, ka Bethany Hospital Outreach, Nongpoh ka la mad ïa ka jingjop da kaba leh ïa ka ‘peritoneal dialysis’ ne ka jingsumar khyllai da kaba pynkhuid ïa ka snam lyngba ka kpoh ha ka sien ba nyngkong eh ha i khyllung ba dang shu kha.
Hapoh ka jingsumar i Dr. D. Ranee, Consultant Paediatrician, ka hospital ka la ai jingsumar ba kyrpang ïa iwei i khyllung iba shitom, kaba pyni ba ka don ka jinglah ban ai jingsumar ba kyrpang bha wat ha ki thaiñ nongkyndong.
Ha ka 30 tarik Jymmang, 2023, la kha ïa iwei i khyllung ha Civil Hospital, Nongpoh, da kaba shu ïarap ne ka ‘Assisted Breech Delivery’. Ine i khyllung im shym la ïam wat haba la dep kha, kaba pyni ba don ka jingthut. Ka kynhun ki nongsumar ka la phah noh ban leit wad jingsumar na Bethany Hospital Outreach, Nongpoh ban sumar bniah.
Ynda poi ha Bethany Hospital Outreach, Nongpoh, la shim ïa ki lad bad la leh ïa ka ‘resuscitation’ ban wanrah jingïaid beit ha ka met i khyllung. Ki jingkhmih ba nyngkong ki pynpaw ba i khyllung i la ïoh ïa ka HIE Stage II (Hypoxic-Ischemic Encephalopathy) kaba mut ka jingshitom ba la ktah ïa ka jabieng namar ka jingduna ‘Oxygen’ na ka jingbym lah ring mynsiem bha bad jingshitom ha u khyllai ba la tip kum ka ‘Acute Kidney Injury’.
Ban leh eiei ïa u khyllai, la ai jingmut ban leh ïa ka ‘peritoneal dialysis’ hadien ba la ïakren bad ki bahaïing. Ka ‘peritoneal dialysis’ ka dei ka rukom ba kham kyrpang khamtam ha i khyllung ba dang kha da kaba weng noh ïa ki jakhlia bad ka um ba tam na ka met, ban wanrah ïa ka jingpynkhuid ïa ka snam.
La sdang ïa ka ‘peritoneal dialysis’ bad hadien la leh ki ‘kidney function test’ kiba pyni ba don jingthut. Hadien kane, i khyllung i la ïoh sa ka jingpang ‘peritonitis’, ka la don sa ka jingmong hapoh kpoh, bad kane ka kynhun ki nongsumar ka la lah ban sumar ïa kane ruh da ka jingjop, ban plie lad ban bteng ïa ka ‘peritoneal dialysis’ haduh ba ka jingtreikam u khyllai ha i khyllung ka la nang bha. Lyngba ka jingsumar ba bniah, ine i khyllung i la pyni ïa ka jingnang koit bad la pyllait noh ïa i ha ka 22 tarik Jylliew, 2023.
La phah wan pyni biang hadien hynñiew sngi bad la shem ba i khyllung i la koit bha. Kane ka jingjop ka long ka ban sah kynmaw namar wat hapdeng ka jingduna ki tiar sumar bad kiwei ki jingeh ban sumar ha ki thaiñ nongkyndong, la ïohi ïa ka jingjop. Kumta ka Bethany Hospital ka la ai jingïaroh ïa i Dr. D. Ranee bad ka kynhun baroh kawei na ka bynta ka jingaiti jong ki kaba la lam sha kane ka jingjop.
