“Ka jingbym pat ïoh rung ka ktien Khasi ha ka khyrnit baphra ka dei namar ka don ka daw”

I mei-ieid Sweetymon i la ong ba kum ka Jaitbynriew lada ngi kwah ban kiew ha baroh ki liang, ngi dei ban pynjah ïa ki jingleh shiliang baroh.

Shillong, Jylliew:

I mei-ieid Sweetymon Rynjah i ba dei iwei na ki nongthoh kot ba pawnam jong ka jylla bad i ba noh synñiang shi kat dei eh sha ka imlang ka sahlang lyngba ki kot ki sla kiba kit jingmut kiba i la thoh, i la ong ba ka ktien Khasi ka long kaba sngewtynnad bad kaba don ïa ka jingmut kaba jylliew bha kaba la buh ha ka mei mariang khnang ba kan nym jah noh na ka jingmut ka jingpyrkhat ka jong ngi.

Haba ïoh ban ïakren bad itei meiieid Sweetymon i la ong ba u longshwa manshwa haba u thoh kot kam dei kaba u shu shim nangno nangno ïa ki jingtip hynrei u la bsut ha u lum, ha ka wah.

Haba kylli na itei i nongthoh kot i ba la ïohpdiang ïa ka jingshah pynkupburom da ka khusnam Tirot Sing Award na ka sorkar jylla halor ka jingkynthup ïa ka ktien Khasi ha ka khyrnit ba phra jong ka riti synshar ka ri, i la ong ba ka jingbym pat ïoh rung jong ka ktien Khasi ha ka khyrnit ba phra ka dei namar ba ka don ka daw bad ka hukum kaba la pynlong ïa ka ktien Khasi ba kan nym kam pat ïoh rung ha katei ka kyrdan haduh mynta. “Ka don ka daw bad ka hukum ba balei kam pat ïoh haduh mynta bad ïa kata ka daw ka hukum dei hi maphi manga bad u Khasi uba mynta ban wad kaei ka daw, ka dei ka daw ïing ne ka dei ka daw nabar”, la ong i mei-ieid Sweetymon.

I mei-ieid Sweetymon i la ong ba kum ka Jaitbynriew lada ngi kwah ban kiew ha baroh ki liang, ngi dei ban pynjah ïa ki jingleh shiliang baroh.

Ha kaba ïadei bad ka jingthoh kot ka jong i, itei i mei-ieid Sweetymon i la ong ba watla i la noh ka met hynrei im ju shong khlem thoh bad haba wan kino kino ki jingmut jingpyrkhat ha ka khlieh i ju thoh beit. “Haba ngi leit ha kino kino ki tamasa ne kino kino, ngi shu peit tang ïa kaba najrong ïa ki hynrei ïa ka tynrai kaba don hapoh bad ka jingbuhrieh jong ki, ngi khlem peit, bad ka tynrai hi ka ïa jan bad ka rukom pyrkhat jong ki longshwa”, la ong i meiieid Sweetymon.

I mei-ieid Sweetymon i la ong ba ka jingnang jingtip bad ka jingshemphang jong ki longshwa kaba ki la bsut ha ka dustur bad ka riti jong u Khasi, ki don la ka dor ka ban siew ïa ka ri bad ka Jaitbynriew bad ki jinglong kiba kham kordor ban ïa ka spah ka hajar. “Ka jaitbynriew ka dei ban kiew ym dei tang ha ka jingriewspah ka pisa ka tyngka hynrei kan riewspah ruh ha ka jinglong mynsiem bad kan pyni ïa kiei kiei ki jinglong ba bha kiba ïadei bad ka mei mariang bad ruh kiba ka pyrthei kaba dang phohsniew mynta”, la ong i mei-ieid Sweetymon.