Shillong, Jylliew 30:
U Myntri Rangbah u Conrad K Sangma u la ong ba ka Uniform Civil Code (UCC) ka long pyrshah ïa ka jingmut jong ka India kaba dei ka ri kaba ïar bad bun ki jaitbynriew bad kane ka jingïadon bun ka dei ka jingkhlaiñ jong ngi kum ka ri.
U Conrad u la pynpaw ïa kane haba buh jingkylli halor ka jingpynkhreh ka Sorkar NDA kaba ïalam da ka BJP ban wanrah ïa ka UCC ban pynlong aiñ.
U la ong ba haduh mynta ym don ba tip kaba kumno ka draft bill kan wan haba ïadei bad kane.
Haba banjur ba ka India ka dei ka ri jong ki jaitbynriew bapher bapher kiba long ka jingkhlaiñ jong ka kum ka ri, u Myntri Rangbah u la ong ba kum ka tynrai, ka (UCC) ka long pyrshah ruh ïa ka riti dustur ki trai muluk ha kane ka Jylla kiba shim jait na ka kmie, bad kaba ju long ruh ka jinglong kyrpang bad jingkhlaiñ kum ki jaitbynriew trai muluk ka Jylla.
Dang shen, ka 22nd Law Commission jong ka ri India ka la pynbna ba kan twad jingmut na ki paidbah bad kynhun niam bapher bapher haba ïadei bad ka Uniform Civil Code, bad kito kiba kwah ban pynsngew ki lah ban phah ïa ki jingpynsngew bad jingmut jong ki hapoh 30 sngi.
