Jowai, Jylliew 29:
U Deputy Commissioner jong ka West Jaiñtia Hills District u Bah BS Sohliya ha ka Sngi Balang u la plie paidbah ïa ka ïing sah na bynta ki nongpang kiba shah ktah ha ka jingmut jingpyrkhat kaba tip kum ka “Half Way Home for Rehabilitation of People Living with Mental Illness” ha Sabahmuswang, West Jaiñtia Hills District.
Ïa kane ka ïing sah la kyrshan jingïarap da ka tnat Directorate of Social Welfare jong ka Sorkar Jylla ka ban khmih bad pynïaid da ka Society for Urban & Rural Empowerment (SURE).
Ha ka jingïalang plie la donlang ka Kong CD Lyngwa, Director of Social Welfare, ka Kong J. Synnah District Social Welfare Officer, ka Kong CW Lyngdoh DSP West Jaiñtia Hills District, ka Dr. AN Paswett Psychiatrist, u Dr. HH Mohrmen Secretary of SURE bad kiwei kiwei. Ka Kong N Shylla Project Coordinator HWH SURE, ka la ïathuh ba ha kane ka ïing sah yn pdiang ïa ki nongpang kiba la pyndep ïa ka jingshah sumar na Sanker lane MIMHANS ha shwa ba kin leit phai sha la ki ïing ki sem.
Shuh shuh ha kane ïing sah yn don 16 ngut ki nongtrei ki ban ai jinghikai kum ki jait shna jingshna bad Counseling nalor ki doktor ki ban wan jngoh ïa ki nongpang.
U Deputy Commissioner, Bah BS Sohliya ha ka jingkren u la ai khublei kyrpang ïa ka Dorbar Sunong Sabahmuswang namar ka jingsngewthuh ïa ka jingdonkam bad ka ai ka jingkyrshan bad NOC ban pynïeng ïa kane ka ïing. U la kyntu ïa kiwei ki shnong ban bud nuksa bad long kiba kloi ban pdiang ïa kum kine ki jaka sah, khamtam ïa kito ki nongpang kiba shah ktah ha ka bor pyrkhat pyrdaiñ. U la ong mynshwa ki briew kiba don jingduna ha ka bor pyrkhat pyrdaiñ ki ju shah ñiewbeiñ ha ka imlang sahlang. Ki don ki por ba ki im jynjar kumno ban pynïadei bad ka imlang sahlang bad don ruh ka khep ba kine nongpang ki shah set la ym dei ha ïing hynrei ha ki along. Hynrei, mynta ym long shuh kumta namar ba ki la don ki lad kiba biang ban ai jingsumar ïa kito ki briew kiba pang ha ki jingmut jingpyrkhat. U la kular ba ka ophis jong u kan ai ka jingïatreilang kumno ban pynbha shuh shuh ïa kane ka ïing sah bad ba ki nongtrei ruh kin ïoh mynsiem ban trei.
