Baghmara, Jylliew 30:
Uwei u samla rangbah ba la don 34 snem ka rta na ka shnong Ramgittim Mahadeo, South Garo Hills, u la ngam jyllop ha ka Wah Mahadeo katba u dang pyrshang ban jam sha shiliang wah da ka bur.
Katkum ka tyllong khubor na ki nongshong shnong, la ong ba katei ka jingngam jyllop ka la jia ha ka 28 tarik Jylliew ha ka por kumba 11 baje mynstep, bad utei u samla rangbah uba la khlad u dei uba la ithuh kum u Walchang Sangma.
Ki nongshong shnong ki ïathuh ba u Walchang u la shna da ka bur ban jam na shiliang sha shiliang jong ka wah namar ka jingkiew jong ka um na ka daw jong ka jingjur jong u slap ha kine ki sngi.
Ki la ong ba ha ka por ba u Walchang u la don ha ka bur, shiliang na ka slipar jong u, ka la hap bad haba u la pyrshang ban shim biang ïa kata ka slipar, ka bur ka la shah tan noh ha ka um bad kumta u la ngam jyllop. Kata ka bur ruh ka la julor syndon hadien ba ka la takhuh bad ki maw.
Ïa ka met jong u Walchang la ïoh ban sei ha katei kajuh hi ka sngi ha ka por kumba 3:15 nohphai sngi bad la aiti noh ïa ka sha ki bahaïing hasem.
