Nongstoiñ, Jylliew 30:
Ka Hynñiewtrep Youths’ Council (HYC) Ri Muliang Circle hapoh ka jingïalam u samla Distarborlin Wanniang, President ka la leit ban ïakynduh ïa u SDO ka MeECL ban ïakren halor ka jingkiew ka bai bording ha ki shnong ka thaiñ Ri Muliang kaba hap hapoh ka Mawshynrut Civil Sub-Division.
Ki nongkitkam ka HYC ki la pynpaw ïa ka jingsngewkhia halor ka jingkiew palat pud ka bai bording ha ki shnong jong katei ka thaiñ kaba la ktah ïa ki paidbah nongshong shnong wat haba ki ïoh bording tang kumba 10 kynta eiei ha ka shi sngi namar ka jingdon jong ka jingpynlip bording.
Shuh shuh ka HYC ka la kyntu ïa u SDO ban shimkhia bad peit halor ka jingkiew ka bai bording, ha kajuh ka por, ka la kyntu ïa ka tnad MeECL ba kan phah peit bniah namarba don ki shnong ha katei ka thaiñ ki bym ïoh bording la kumba shi bnai eiei khamtam ha ki por slap.
