Shillong, Jylliew 30:
Ki pulit ka East Khasi Hills ha ka Sngi Thohdieng ki la ai biang ïa ka jingmaham pyrshah ïa kito kiba tah da ki ïit ïong bad kiba pyndait da ki kor jingpynsawa (Siren) ha ki kali jong ki.
Ha u kyrwoh khubor, ki pulit ki la ong ba ki la ïohi ba ki don bun bah ki kali kiba tah ïit ïong kaba long ka jingleh pyrshah ïa ka hukum jong ka Supreme Court (WP (C) No. 265 jong u snem 2011) ha kaba ka ïingbishar bahalorduh ka la khang ban pyndonkam ïa kino-kino ki jingtah ïong ha ki ïit kali.
Ha kajuh ka por, ki pulit ki la ong ba ki la ïoh jingujor na ki ’riew paidbah ba ki don ki kali kiba pyndait da ki kor jingpynsawa (Siren) kaba long be-aiñ.
Namarkata, ki pulit ki la kyntu ïa baroh kiba la tah ïit ïong bad pyndait ïa ki kor jingpynsawa ba kin weng noh mardor lym kumta yn sa leh da kaba tyngeh katkum ki kyndon aiñ.
