Jowai, Jylliew:
Ki shakri niam ka Raij Jowai ha ka jingïalam u Dolloi, Pator ryngkat ki Soo Langdoh ba kynthup ïa u Langdoh Chyrmang, Langdoh Jowai, Langdoh Tuber bad u Langdoh Ialong ryngkat ki Phra Kur Phra Kmai bad ki ‘riew rangbah ka Raij ha ka 29 tarik Jylliew ki la leit sha Lum Mookhai ban pyndep ïa ka kñia ainguh kyrpang ïa u Syiem Pyrthat bad ïa u Mon Ryngklaw.
Shwa ban mih na Yung Langdoh, kawei na ki lehniam ba hap ban pyndep kadei ka ‘Peit Tpu Niam’ kaba long na bynta u Dolloi, ka Langdoh, u Langdoh bad ka Raij ka shnong ha kaba ïa kine ki lai tylli ki ‘Tpu Niam’ la shet kyrpang da ka Langdoh.
Naduh ba mih na Yung Langdoh uwei na ki riew rangbah lynter lynti u la pyrta pynbna khnang ban tip ki khun ka shnong ka Raij ban wan lang ha Lum Loom Mookhai. Hakhmat ka Duwan Kñia ïa ka Lehniam la pyndep da u Sangot Paswet da ka jingsynranlang u Sangot Pakynteiñ bad Sangot Pasubon kiba long ki pateng khun pateng ksiew jong ka kur Sookpoh Khat-ar Wyrnai.
U Puramon Kynjin, Dolloi Elaka Jowai haba ïakren u la ïathuh halor kane ka lehniam, u la ong kumba ki Soo Langdoh ha ka nongrim bad jinghikai niam ba la ïoh pateng ki pyndep hok ïa ki kular u Trai Kynrad ha u Hynñiewbasa bad u khmih ba ka suk ka saiñ ka bha ka miat bad ka roi ka par kan wan ha ka shnong ka Raij kumjuh haka Elaka baroh kawei.
Shuh shuh kumba ka jingainguh aidem ba shisien shi snem ïa u Syiem Pyrthat bad ïa u Mon Ryngklaw, u la ong mynta ka sngi ka long kaba hun blei hun syiem da ka jingïatreilang ki Soo Raij Soo Langdoh, ka niam ka rukom dustur ruh kan nangheh nangkrai da kaba ki shakri niam jong ki Soo Raij-Soo Langdoh ki shimkhia ban pyndep hok ïaka mon u Trai Kynrad bad ban nang ruh ban burom kheiñkor bad ban pynkhraw ïaki jingkyrkhu ba la ïoh kiba u Trai Kynrad bad ki blei ki Syiem ki ai na ka por sha ka por. Khatduh ïa kane ka lehniam la pynkut da ka jingïateh jutang hapdeng u Kongwasan Ka Raij Chyrmang ba ïeng na bynta ki Soo Langdoh bad u Dolloi ka Elaka Jowai.
