Imphal, Jylliew 30 (UNI):
Ki paidbah nongkyrshan ha ka Sngi Thohdieng ki la leit pynsangeh ïa u Myntri Rangbah ka Manipur, u N Biren Singh, na ka jingthmu ban hiar shuki.
Ha kane ka sngi, ki paidbah ki la leit tur sha Secretariat bad ki la pynsangeh ïa u Biren Singh na ka jingleit ïakynduh ïa ka Lat ka jylla. Kine ki paidbah ki khlem treh satia ban mih na khyrdop Secretariat katba ym pat tar ïa ka shithi ba u Biren Singh u la thoh sha ka Lat ba un iehnoh ïa ka kam Myntri Rangbah.
Kham hadien, ha ka por kumba 4 baje janmiet, u Biren Singh u la thoh ha rynsan ‘Twitter’ da kaba ong, “Ha kum kane ka khyllipmat bakongsan, nga kwah ban pynshai ba ngan ym hiar satia na ka shuki Myntri Rangbah.”
Hadien ba ka jingïakynad ka la mih ha ki jaka sor ha ka miet Sngi Palei bad hadien ba uwei u briew u la khlad. Ka jingkhlad jong uta u briew ka long hadien ba la kynnoh ba u la shah pynshitom jur. Na kane ka jingjia, ki khubor ki ïathuh ba u Biren Singh u la rai ban hiar shuki noh.
Hynne ka sngi, ki paidbah ki la ïa ap hajan ka Raj Bhavan ban peit kaei ka ban jia bad ka jingbun palat jong ki briew ka la buh jingeh ïa ki pulit pahara.
U Biren Singh u la wan mih na Secretariat sha surok, hynrei ki paidbah ki la pynsangeh ïa u. Ki arngut ki Myntri Sorkar, u K Govindas bad u Th Susindro, ki la mih na Secretariat bad ki la rah lang ïa ka shithi iehnoh kam jong u Biren Singh. Hynrei ïa kata ka shithi la knieh noh da ki katto katne ki longkmie bad ki la tar ïa ka.
Kitei ki Myntri ki la kyntu ruh ïa ki paidbah ba kin ïa pra noh bad leit phai na Secretariat bad ha kajuh ka por ba kin ym pynthut ïa ka shongsuk shongsaiñ. Hadien ba ki la sngewthuh ba u Biren Singh un ym hiar shuki, ki paidbah ruh ki la ïa pra bad leit phai noh.
