Jowai, Jylliew 30:
Ki pulit ka Jowai ki la ïoh kem ïa 2 ngut ki nongkhaïi drok ryngkat u drok ‘heroin’ uba khia 4.61 ‘gram’ bad ka pisa kaba T.1,90,000 ha ka step 30 tarik Jylliew.
Kine 2 ngut kiba la shah kem ki dei ba la tip kyrteng kum u Jimmy Sutnga bad u Sdangki Myrphet.
U Superintendent of Police, West Jaiñtia Hills, C. Syrti u la ïathuh ba ki la ïoh kem shuwa ïa u Jimmy bad lyngba kane ki la ïoh ksai shuh bad kem sa ïa u Sdangki Myrphet uba dei uwei pat u snar nongkhaïi drok ha Jowai.
Ha ka jingtalasi ïa ka met jong u, la ïoh kurup 4.61 ‘gram’ u ‘heroin’ bad ïa kane la pyntikna hadien ba la leh ïa ka ‘test’.
Nalor u drok ki pulit ki la kurup ïa ka pisa T. 1,90,500 tyngka, kawei ka Alto 800 ba khlem nombor.
Kiwei pat ki tiar kiba la kurup ki kynthup ïa ki synduk sabon, tin ‘golden’, synduk let bad kiwei-kiwei ki tiar.
Ki pulit ki la pynngat mukotduma pyrshah ïa kitei ki 2 ngut bad ka jingtohkit ka la ïaid shakhmat.
