Williamnagar, Jylliew 30:
Ki pulit ka East Garo Hills ha ka Sngi Thohdieng ki la pynpaw ïa ka jingsuba kaba jur ba uwei u briew uba la 38 snem ka rta u la shah pynïap hadien ba la lap ïa ka met jong u da ki nongshong shnong hajan ka shnong Samanda Megapgre kaba hap ha ka jingpeit ka thanat Williamnagar.
Katkum ka tyllong khubor, ki pulit ki la ïoh jingtip na kitei ki nongshong shnong ba u don u briew uba la thiah ïap hajan ka thuk-thuk kaba don ïa u nombor ML 07A 7533 ha ka surokbah NH – 44 kaba jngai kumba 15 km na Williamnagar.
Hadien ba ki pulit ki la leit sha katei ka jaka, ki la shem ba uta uba la khlad u dei uba la tip kyrteng kum u Dalmen M Sangma uba na dong Baija kaba hap ha Williamnagar.
Kumta ki pulit ki la rah noh ïa ka met u Dalmen ban leh ïa ka ‘post-mortem’ bad hadien kata, la aiti sha ki bahaïing hasem.
“Ngi suba ba utei u briew u la shah pynïap, hynrei ki jingtip kiba kham bniah kin sa mih ynda la pynlong ïa ka jingtohkit,” la ong u SP ka East Garo Hills, u Siddharth Ambedkar.
