Shillong, Jylliew 30:
U Myntri ka Sorkar Jylla, Bah Paul Lyngdoh ha ka Sngi Thohdieng u la ong ba ka jingshim rai jong u halor ka Chairperson ka Meghalaya State Commission for Women (MSCW), Kong Phidalia Toi ka dei namarba kam shym la ïashim bynta ha kumba 12 tylli ki jingïalang ba donkam jong ka Commission nalor ka jingïadon bynta jong ka ha ki kam ïalap ilekshon.
“Haba ngi pyndep la ka kamram kum u Myntri, ngi la bam smai ban pyntreikam hok ïa la ka bor khlem kano-kano ka jingtieng ne jingshah liang na bynta jongno-jongno, kine ki dei ki kyntien kiba ngi la pyndonkam,” la ong u Bah Lyngdoh haba kren sha ki lad pathai khubor.
U la pynsngew ruh ba ka jingshim rai jong u halor katei ka liang ka long hadien ba u la khmih bniah ïa ka ‘File’ kaba la kdew shai ba ha kiba bun na ka samoi treikam jong ka Kong Toi, kam ju wan ïashim bynta ha ki jingïalang ba kongsan jong ka Commission.
“Ha ka jingshisha kam shym la ïashim bynta ha kumba 12 tylli ki jingïalang jong ka Commission bad ka don ruh ka bynta halor ka jingïadon bynta jong ka ha ka jingïalap ilekshon. Hangne, wat lada phi ieh noh ïa kine sharud, ka long kaba donkam ïa ka briew shisien ba la shimti kum ka Chairperson jong ka Commission, ka la dei ban kiar na ki kam saiñ pyrthei,” la ong u Myntri.
Ha kajuh ka por, u la kren shai ba um don kano-kano ka daw shimet pyrshah ïa ka Chairperson hynrei u don ha ka kyrdan kaba u hap ban shim ïa ka rai.
“Mynta ngin jam sha kawei pat ka bynta, nga la dep rai ban thaw ïa ka kynhun ‘Search Committee’ ba kynthup ïa ki ophisar Sorkar bad bym dei ophisar (Principal ka Women’s College bad Lady Keane College),” u la ong.
Haba kylli, u Bah Lyngdoh u la ong ba ban ïoh ïa ka jingshakri kaba paka, ka tnad kan pyrshang ban kyntiew ïa ki jingïoh jingmyntoi hynrei ha kajuh ka por, hap ban sngewthuh ba ki don bun bah ki briew kiba trei ha ki jaka ba kyndong jong ka Jylla ha ryngkat kiba bun ki jingeh hynrei kiba ai ka jingshakri kaba paka sha ka Jylla.
Shuh shuh haba ai nuksa ïa u Thomas Jones, u la bynrap, “Kam dei kaba suk ïa u Thomas Jones ban poi sha Sohra ha u 1841…ban wan poi hapdeng ki briew kiba um ïasngewthuh ktien hynrei kumno pat u la lah ban wanrah jingkylla shi kat dei ha ka pule-puthi. Hato phi tharai un kren shaphang ka jingsiew, kali, ‘helicopter’…em.”
