Shillong, Naitung 02:
Ka tnat ka koit ka khiah ka la hap ban bret noh katto katne ki dawai namar ki dei kiba la kut ka por ban pyndonkam, bad kine ki dawai ki dei ruh ki bym shym la ïoh ban pyndonkam ha ka por COVID-19.
Ïa kane la ïathuh da ka tnat ka koit ka khiah lyngba ka Director of Health Services (MI). Dang shen ka tnat ka koit ka khiah ka la hap ban leit bret noh ïa ki dawai ba bun jait sha jaka bret jaboh jabaiñ kaba don ha Mawlai Mawïong.
La ong ba ki dawai ki dei kiba la pan katkum ka jingdonkam jong ki district bapher bapher bad ki jaka sumar ha kane ka Jylla.
Shuh shuh ki don ruh ki dawai kiba la buh lypa ha ki jaka pyllang dawai (Central Medical Store) khnang ban ïoh pynbiang ha kano kano ka por ba mih ki jingdonkam kiba long kyrkieh eh.
Hynrei namar ka jingpang COVID-19, kine ki dawai ki la shu sahkut ha jaka pyllang dawai bad ym shym la mih kano kano ka jingdonkam ha kato ka por. Namar kata kine ki dawai ki la shu kut noh ka por namar bym pyndonkam bad mynta kim long shuh ban pyndonkam.
Kumta ïa kine ki dawai la donkam ban pynkhuid noh namarba lada buh sah ïa ki, ka jaka ruh ka khapngiah ha ka jaka pyllang dawai namarba hap ban buh sa ïa ki dawai kiba dang wanrah thymmai.
La ïathuh ba ïa ka jingdonkam ban bret noh ïa ki dawai kiba la kut ka por, la dep pyntip da u Pharmacist ba dei peitbniah ïa ka Central Medical Store jong ka Directorate Health Services (MI) lyngba ka shithi kaba 27 tarik Jymmang, 2023 na ka bynta ban pynkhuid noh ïa ki dawai kiba la kut ka por ban pyndonkam. Ïa ka thup kyrteng ki dawai ruh la pynshisha da ki bor ba dei khmih, ha kaba u Assistant Drugs Controller ka Directorate of Health Services (MI) ruh u la dep phah ïa ka shithi sha u Pharmacist ba peit ïa ka Central Medical Store ha ka 19.06.2023.
Nalor kata, u Pharmacist ba peit ïa ka jaka pyllang dawai u la pyntip biang sha ki bor ba dei khmih na ka bynta ban pynkhuid noh ïa ki dawai kiba la kut ka por, bad ka jingbret ïa ki dawai la leh ha ka 29 tarik Jylliew, 2023.
