Shillong, Nailar 05
U Symbud Myntri Rangbah ka Jylla ba khmih ïa ka tnad Transport, Bah Sniawbhalang Dhar, ha ka Sngi Balang u la ong ba ka skhim ‘One-time Settlement’ (OTS) jong ka Sorkar na ka bynta ki trai kali, ka la lum palat T.20 klur haduh mynta, bad la khmih lynti ba ka jinglum khajna ka lah ban kiew shuh hashuwa jong ka por ba la buh, kata ha ka 31 tarik u Nailar.
“Haduh mynta ka sngi, ngi la tam ïa ka T.20 klur. Kyrmen ba kin wan shakhmat haduh ka sngi kaba khatduh,” la ong u Bah Dhar.
U la ong ruh ba ka Jylla ka lah ban ïoh biang haduh T.200 klur lada baroh kiba khlem siew kin wan shakhmat.
“Ka lah ban kot sha ka T.200 klur, ngam lah ban ong. Hynrei kan sa poi ne kot T.200 klur kaba ka Sorkar kan sa ïoh biang. To ngin ap, namarba ki jingkheiñ ki kylla man la ka sngi,” u la ong.
Na ka liang u Bah Dhar u la kyntu ïa ki trai kali ban shim kabu ïa kane ka skhim, da kaba ñiew ïa ka kum kawei na ki skhim kaba bha tam kaba ka Sorkar ka tyrwa.
“Kan long ka jingduhnong jong ki hi lada kim kohnguh. Ka shong ha ki. Nga tikna ba kan kot sha ka 80-90%,” u la ong. Halor ka jingktah ïa ka khajna jong ka Jylla, u la pynshai ba namarba ki jingsiew ki dei ki jingdaiñ kuna, ka jingmap kan ym ktah ïa ka jingkamai kaba man ka por.
“Kane ka dei ka kuna, kumta kan ym ktah ïa ka khajna jong ka Sorkar. Lada ngi ïoh ïa ka, ka dei ka jingpyndap shuh. Nga la dep pynpaw ba ka kuna (ba la map) ka jan kot sha ka T.800 klur. Kata kam dei ka khajna ba shisha,” ong u Bah Dhar.
