Shillong, Nailar 05
Ki nongdie madan ba ha ka thaiñ Laitumkhrah ha ka sngi Balang ki la wan tur biang hakhmat ka ophis Shillong Municipal Board (SMB) ha ryngkat ki kot jingthoh ban dawa ban ai lut ïa ki Certificate of Vending (CoV) sha baroh kiba shongdie madan bad ban ai jaka hapoh ka Ïew Shillong.
Kum ban shu kdew hangne ki nongdie madan ha Laitumkhrah ki la sdang ban leit tur ha ophis ka SMB naduh ka 4 tarik Nailar ban pynpaw ïa ka jingpyrshah halor ka jingthmu ka Sorkar Jylla ban pynkynriah ïa ki sha Brightwell, Barik Shillong.
Haba kren sha ki nongthoh khubor ki nongdie madan Laitumkhrah ki la kyntait ïa ka jaka ba ka Sorkar ka la ai ïa ki sha Brightwell Barik da kaba ki la kynnoh ba ka jaka kam long kaba biang na ka bynta ban die jingdie, hynrei ki la pynpaw ka jingkyntu ïa ka Sorkar ba ka dei ban ai jaka ïa ki ha Ïew Shillong Laitumkhrah. “Ka jingai jaka ka Sorkar ha Brightwell kam shym la pyntip ïa ngi, hynrei ka shu thoh ha Certificate of Vending (CoV) ba la ai jaka ha Brightwell” ong ki nongdie madan.
Ki nongdie madan ki la kynnoh ba ka Sorkar ka la leh shiliang ïa ki namar ha Laitumkhrah ki don 140 ngut tam ki nongdie madan, hynrei kiba ïoh ïa ka CoV ki long tang 30 ngut tam bad bun ki dei ki bym pat ïoh ïa ka CoV.
Shuh-shuh ki la ïathuh ba na ka liang ka Sorkar ka la ai ka jingpynbna ba naduh ka 17 tarik u Nailar kiba shong die madan ha Laitumkhrah ki dei ban kynriah noh sha Brightwell, hynrei na ka liang jong ki, ki la dawa ïa ka Sorkar ba kan ai jaka ïa ki ban shnongdie jingdie ha ka ïew Shillong kaba don ha Laitumkhrah. “Ngi dawa beit ba ka Sorkar ka dei ban ai ïa ngi ban shong die jingdie ha ka Ïew Shillong, lada thep lut baroh 140 ngut kiba shong dukan ha Laitumkhrah ruh ka dang kylluid bha” ki la ong.
Ki la pynpaw ba lada ka Sorkar lyngba ka tnad Shillong Municipal Board kam sngap ïa ka jingdawa, kin bteng ban wan ïakhih man ka sngi haduh ka 17 tarik u Nailar hakhmat ka ophis jong ka SMB, lada ka Sorkar kam ai CoV lut bad lada kam pynsngap ïa ka jingdawa ban ai jaka hapoh ka Ïew Shillong.
