Shillong, Nailar 05
Ka jingwanrah ka Sorkar India ïa ka Special Intensive Revision ban pynthymmai ïa ki nongthep vote hapoh ka ri bad ha Meghalaya la lap ba palat 27,287 ngut kiba la jah rngai namar kim don shuh ha ka Electoral Roll ba thymmai ha East Khasi Hills District ki kham bun ki dei ki constituency na sor Shillong.
Kane ka jingpaw kiba bun kiba jah na Electoral Roll ka dei ha ka jingpyllait paidbah ka ophis Deputy Commissioner ka East Khasi Hills District ha ka sngi Balang ïa ka Draft Electoral Roll ha ka jingïalang kaba la long ha katei hi ka ophis khnang ba kito kiba jah, ki bym treh soi kyrteng ïa ki phom ki lah ban ai jingthoh sha ka ophis Deputy Commissioner EKH hashwa ban pyllait paidbah ïa ka Electoral Rolls kaba khatduh ka ban long ha u bnai Risaw 2026.
Katkum ka jingbatai ki nongtrei ka tnad Election, kine kiba jah ki dei namar kim don ïa ki kyrteng kmie kyrteng kpa, kim don ki kyrteng Kmieieid bad Paieid bad kim don shuh ha ïing ba ki ju sah.
Haba ki BLO ki la leit haduh hynriew sien, kine ki briew kim shym la don ki bahaïing kim shym la sah shuh ha katei ka jaka kumta ki nongtrei ka tnad Election ki la shim ba kitei ki briew ki dei kiba la jah.
Kiba bun ki bym shym la ïakynduh shuh ki dei na Pynthorumkhrah Constituency ki don 3472 ngut, East Shillong Constituency 2963 ngut, North Shillong Constituency 2983 ngut, West Shillong Constituency ki don 3324 ngut, South Shillong Constituency 3991 ngut, Nongthymmai Constituency 3776 ngut bad Mawlai ki don 2673 ngut. Katba 2697 ngut ki dei bym treh soi kyrteng shuh ïa ka phom, ki bym kwah shuh ban pyndap ïa ka phom bad khambun dei kiba u lok u la phet, ka lok bad ki khun kim treh soi shuh ban ai jingpynshisha.
Kiba la khlad pat ki don haduh 27,319 ngut, kiba la rah ïa ka dur thep vote na kawei ka jaka sha kawei pat ki poi 10,959 ngut.
Nangta kito kiba don jaka thep vote ar tylli kiba la phah delete noh na kawei ka jaka ki don 1,727 ngut.
Shuh shuh ha kane ka jingpynthymmai ïa ki nongthep vote la lap ba ha East Khasi Hills ki don ar ngut kiba dei ki shynrang kiba pynkylla kynthei ne ki kynthei kiba pynkylla shynrang ki dei na Pynthorumkhrah Constituency. Ka jingdon ki nongthep vote ha kine ki snem ba la dep ha East Khasi Hills ka long 6,32,146 ngut hynrei naduh ba leh ïa ka SIR, ka jingdon ki nongthep vote ka sah sa 5,62,160 ngut hadien ba la dep weng lut ïa kiba la khlad, kiba la jah rngai, ki bym kwah soi kyrteng, kiba la phah weng noh ïa kiba don dur thep vote ar tylli bad kine baroh ki la poi sha ka 69,986 ngut.
