Shillong, Nailar 05
U President ka Voice of the People Party (VPP) u Bah Ardent Miller Basaiawmoit u la kyntu ïa ki paidbah ba kin long jai jai ban ym pynmih jingkulmar lashai ka sngi ka 6 tarik Nailar haba ki pynlong ïa ka jingïaid paidbah ban leit tur sha Secretariat ban pynsngew ïa kiba bun ki mat jingdawa ba sahteng.
Katkum ka durkhih ba la pyllait hapoh rynsan ‘Instagram’ jong u hi, u la ong ba ha kane ka jingleit tur sha Secretariat wat hapdeng ka jingdom bad jingbitar ïa ka jingleh ka Sorkar hynrei ki paidbah ki dei ban pynjaijai ïalade ban ïashim bynta ha kane ka jingïaid paidbah khnang ban ym ailad ïa ki riew shim kabu ban pynsniew dur ïa kane ka jingthmu ka seng.
U la ong ba kane ka jingthmu kam dei ka jingmyntoi ka VPP hynrei na ka bynta ka jaidbynriew, na ka bynta ki khun samla wad kam wad jam bad kiwei.
Ka seng ka maham tyngeh ïa kino-kino kiba thaw ban pynkulmar lashai ka sngi bad lada ki lap ïa kiba kum kita, ka seng kan shim ïa ki sienjam ba tyngeh pyrshah ïa ki. Kumban shu pynkynmaw ki don kumba shiphew tylli ki mat ki jura kiba ka VPP ki la buh hakhmat ka Sorkar kine ki long ban pyndam beit ïa ka projek dewlynnong Lumpongdeng.
Ban wanrah ïa ka District Selection Committee (DSCs) bad ka Meghalaya Public Service Commission (MPSC) kaba khuid ba suba.
U la ong ba ka seng dang shen ka la thoh sha u Chief Secretary ban pynduh noh ha kaba ïadei bad ka jingkynnoh ba don ki jingleh bymsuidniew ha ka rukom thungkam thungjam jong ka West Jaiñtia Hills DSC bad kam ba ka don ïa ki sakhi sabut kiba pyni ba ki don ki kyrtong, kiba la pyrshang tang katto katne ki jingkylli, kiba la shah jied sha ka interview. Ka VPP ka la pynpaw biang ïa ka jingpyrshah ban buh ïa ki karkhana coke bad cement ha ka Jylla, nalor ba ka dawa ïa ka jinglong kaba shai bad ka jingkitkhlieh ha ki kam kiba ktah ïa ki nongshong shnong.
Ka seng ka pyrshah ban phah ïa ki nonghikai na ka bynta ki kam kheiñ briew Census bad ki kam ilekshon, ban dawa ban sangeh noh ïa ka jingthung ïa ki nongtrei Sorkar kiba la shongthait, ban ïada ïa ki jaka jong ki paidbah, ki lad ban talasi ïa ki nongwan buhai shnong beaiñ ki briew kiba nabar bad ban thaw ïa ki lad kamai jakpoh na ka bynta ki briew trai shnong. Ha kaba ïadei bad ka jingtih dewïong dei ban buh ïa ki lad ki lynti bad ki kyndon kiba biang khnang ba ki briew kin ïoh ban kamai jakpoh.
