Shillong, Nailar 05
U Symbud Myntri Rangbah ka Jylla ba khmih ïa ka tnad pynroi sor, Bah Sniawbhalang Dhar ha ka Sngi Balang u la ong ba ka Sorkar Jylla kan sa khot jingïalang ïa ki tnad treikam (ba dei khmih) mynta u bnai ban ïakren halor ka mat ba sahteng, kata ban pynkynriah ïa ki briew kiba shong ba sah ha Them Ïew Mawlong.
Haba kren sha ki nongthoh khubor, u Bah Dhar u la ong ba la bthah ïa ki ophisar ban lum ban lang ïa ki kaiphod nalor ki jingpyntip na baroh ki tnad treikam ba dei khmih hashuwa jong ka jingïalang.
“Ngi thmu ban pynlong ïa ka jingïalang, lehse ha ka taïew ba khatduh jong u bnai. Nga la dep ban kren ïa ki ophisar jong nga na ka tnad ban pynïoh ïa ki jingtip ba bniah bad ki kaiphod na ki tnad treikam bapher-bapher,” la ong u Bah Dhar.
“Ngin sa don ka jingïalang ban ïakren halor kane ka kam ha ka bynta ba khatduh jong u bnai Nailar,” u la bynrap.
Haba kylli la hato ka Harijan Panchayat Committee (HPC) kan don bynta lang ne em ha ka jingïalang kaba nyngkong, u Symbud Myntri Rangbah u la ong ba ka sien kaba nyngkong kan long tang hapdeng ki tnad treikam Sorkar.
“Ka jingïalang kan long shuwa hapdeng ki tnad treikam bad nangta ngin sa khot ïa ki briew na ka liang jong ki,” ong u Bah Dhar.
U la ong ba ka Sorkar ka dang wad ïa ka kaiphod kaba bniah ka ban kynthup ïa baroh ki liang haba ïadei bad kane ka kam.
“Ngin sa lum ïa baroh ki kaiphod ha ka rukom kaba bniah hapoh jong ka tnad, bad ka kaiphod hapdeng ki tnad treikam ba dei khmih bad ka Harijan Colony, bad ka kaiphod hapdeng ki Harijan, ka Sorkar bad ka tnad ïada ri. Kumta, nga la ong ïa ki ba kin long kiba la khreh bad baroh. Kumta ha ka bynta ba khatduh jong u bnai Nailar, ngin sa don ka jingïalang halor kane ka mat,” u la ong.
Haba kylli balei, ba ïa kane ka kam, ym shym la lah ban pynbeit mynta lah bun-bun snem, u Bah Dhar u la kubur ïa ka jingeh hynrei u la ong ba ki jingpyrshang ki dang ïaid shakhmat khnang ban lah pynbeit noh ïa kane ka kam.
“Hooid ka dei ka mat kaba la slem bha, hynrei dei na kata ka daw ba ngi ïai pyrshang. Namarba ka dei ka mat kaba la slem, kumta kam long kaba suk, hynrei ngi pyrshang katba lah ban pynbeit ïa ka,” la ong u Bah Dhar.
