Nongstoiñ, Nailar 05
Ha ka sngi Balang ka Synjuk ki Nongsynshar Shnong Hima Nongmynsaw Syiemship West Khasi Hills kala leit ban aiti ïa ka dorkhas bad ïakynduh ïa ka Deputy Commissioner ka West Khasi Hills ha kajuh ka por kum ka Member bad Convener ka Regional Committee West Khasi Hills District ban ïakren halor ka jingpynbeit ïa u pud u sam na ka bynta ka Langpih sector.
Katkum ka dorkhas, kaba ka Synjuk kala aiti sha ka DC kala pynpaw ïa ka jingsngewkmen ba ka Sorkar Jylla kala shimkhia ban thung biang ïa ka regional committee ka ban khmih bniah ïa ka mat ïakren pynbeit pud hapdeng ki ar tylli ki Jylla (Meghalaya & Assam) kaba la thung ruh ïa u Myntri ka Sorkar Jylla Bah Metbah Lyngdoh kum u Chairperson bad ïa ka Deputy Commissioner kum ka Member Convener na ka bynta ka West Khasi Hills District kaba dei na ka bynta ka jingïakren pynbeit ïa ka Langpih Sector.
Shuh shuh ki katto katne ki mat ïa kaba ka Synjuk kala pynpaw ha ka dorkhas ka long ba ha kane ka regional committee dei ban kynthup lang ruh ïa ki nongmihkhmat kiba dei na ka Synjuk ki Nongsynshar Shnong Hima Nongmynsaw Syiemship, na ki khlieh Nongsynshar Shnong ne Sordar Shnong kiba hap hapoh ka Langpih sector, ki nongïalam na ki sengbhalang bapher-bapher kiba don ha ka thaiñ. Nangta, sa kawei pat ka mat ka long ban khot noh ïa ka jingïalang ka Committee hashwa ban ïaid shakhmat ïa kiwei pat ki bynta.
Kumjuh ruh, ka Synjuk kala kyntu ban buddien bniah ïa ki kot ki sla bad ki mat ïakren kiba la shim da ka regional committee kaba la dep, bad ka Synjuk kala kdew ruh ba kumba tip ha ki ar tylli ki regional committee kiba la lamkhmat kum u Chairman da u Bah Renikton Lyngdoh Tongkhar bad u Bah Paul Lyngdoh ha kaba ar, kine ki Committee kila shim ïa ki sienjam ïakren kiba bun, bad ka jingkhot jong u member secretary uba dei u Deputy Commissioner ka West Khasi Hills District ha kitei ki por u Bah LSN Garod Dykes (IAS) uba la kynthup ruh ïa baroh ki khlieh nongsynshar shnong kiba dei hapoh ka Langpih Sector kaba la ïa khmih bniah ruh ïa ki jaka ki puta kiba ka Sorkar Meghalaya ka kam shapoh u pud jong ka, kala long ka jinghun ïa ki paidbah ka thaiñ.
Kumta, ka Synjuk ka kyntu ba ka jingïakren ka dei ban bteng na kijuh ki rukom kumba la leh da ki regional committee kiba la dep ym ban sdang thymmai da ka committee kaba thymmai.
Ha ka dorkhas la kyntu ruh ban pynneh ïa ka Langpih sector ha Meghalaya, ha kaba la ong ba na ka liang ka Synjuk ki Nongsynshar Shnong ryngkat ka jingïasngewthuh jingmut lang bad ka ophis Hima Nongmynsaw Syiemship kala ju thoh ïa ki mat ba donkam sha ka regional committee bad sha ki bor Sorkar ba katei ka jaka, ka Langpih Sector kam dei ban shah pynhap sha Assam hynrei ka dei ban neh ha Meghalaya.
Kumta na ka liang ka Synjuk ka khmih lynti ba kane ka regional committee ba mynta kan shimkhia bad khmih bniah khnang ba kan ym shah pynhap sha Assam.
Ka Synjuk kala buh ruh ïa ka jingkyrpad ban pynlong ïa ka jingjurip ba ka Sorkar Meghalaya ka dei ban phah ïa ki briew Sorkar sha ki shnong ki thaw lyngba ka regional committee kiba shong basah ha ki thaiñ khappud khnang ban pyntikna ïa ka jingkwah ki paidbah nongshong shnong ne ka jingmon jong ki, ban shong ban sah ha Meghalaya.
U Bah Serbilin Lyngdoh, Secretary ka Synjuk haba kren bad ki nongthoh khubor u la ong, halor kine ki mat, ha ka jingleit ïakynduh, ka DC kala kren shai ba kan sa shimkhia.
Haba kren ha kaba ïadei bad ka Langpih sector, u Bah Serbilin u la ong ba ki nongshong shnong jong katei ka thaiñ ki kwah beit ban hap sha Meghalaya bad ym don ki nongshong shnong ban leit sha Assam namar kata ka Synjuk kala pynpaw ha ka dorkhas ba ki nongshong shnong ki dei ban hap beit sha ka Jylla Meghalaya ha kane ka jingïapynbeit pud bad ym dei ban bakla.
U la ong ruh ba na ka liang ka regional committee haba ïakren pynbeit pud ka dei ban leit lyngba ka sur jong ki paidbah, bad ka Assam kan nym shim ïa ka jingïapynbeit pud da kaba shu pynbor ïa ki paidbah kumba long ha baroh shikatta.
U la ïathuh ba kila kren shai hakhmat ka DC ba ka Sorkar Assam ne Meghalaya kam don hok ban shu pynbor hynrei ban ai ïa ka mon laitluid ïa ki paidbah ba kin jied ïa ka jingkwah ka jong ki, la bynrap u Bah Serbilin.
