Khliehriat, Naitung 02:
Ka Jaiñtia Students’ Union (JSU) ka la pynskhem ïa ki nongkitkam thymmai jong ka Khliehriat Circle na ka bynta ka samoi treikam u 2023-2026 ha ka jingïalang kaba la long ha Community Hall, Khliehriat West ha ka Sngi Thohdieng.
Ïa ka jingïalang la pynïaid da u Rikut Pareiñ ha ka jingdonlang u kongsan uba dei u MLA barim ka Khliehriat, u Bah Justine Dkhar, u DSP ka East Jaiñtia Hills District, u Jason Mairom bad u Dr. Phervision Nongtdu, Principal Jaiñtia Eastern College, Khliehriat kum ki symbud kongsan nalor ki nongïalam sengbhalang ba kynthup ïa ka KSU, HNYF, FKJGP bad EJNC.
Ïa ki dkhot nongkitkam la pynskhem da u President rangbah ka seng, u Bah Jersom Shylla uba la kyntu ïa ki nongkitkam bathymmai ban trei shitom haba shakri ïa ka jaidbynriew.
U kongsan, u Bah Justine Dkhar u la ai mynsiem ïa ki dkhot ban ïaid ha ka lynti ka hok bad ban trei shitom ban im ka ri bad ka jaidbynriew.
U Dr. Phervision ha ka jingkren u la ong kumba ka JSU ka dei ka seng jong ki samla pule, kumta u la kyntu ïa ki nongïalam ban buddien bha halor ka jingdawa CUET Examination Centre hapoh ka Jylla khnang ban lait ki samla ban leit shabar jong ka Jylla.
U General Secretary ka JSU, u Bah Treiborlang R. Suchen u la bynñiaw halor ka jingpynslem ka Sorkar ban pynbiang ïa ki jaka thoh eksamin CUET ban ïoh myntoi ki khynnah pule.
Shuh shuh haba kren shaphang u drok, u la ong ba ka JSU ka kloi ban ai ka jingïatreilang bad ki bor pulit kumjuh ki bor shnong ban tehlakam ïa ka jingwan rung u drok shapoh ka thaiñ ka shnong bad ka Jylla.
Ki nongkitkam thymmai ka Khliehriat Circle ki kynthup ïa u President Livingson Dkhar Sana, Vice President Winchester Salahe, Secretary Ajoymension Lyngdoh bad kiwei-kiwei.
