Shillong, Naitung 02:
Ka jingjur slap ha kane ka Jylla ka la nang bteng bad ki jingshah ktah ruh ki la jur ha kaba 12 ngut ki briew ki la khlad tang hapoh shibnai kata naduh ka 1 tarik Jylliew haduh mynta, bad kumba 36 tylli ki jingtei jingshna kynthup ki surok ki la shah pynjulor na ka jingjur slap.
Katkum ka jingbuh jingthoh ka State Disaster Management Authority (SDMA), ki la don 213 tylli ki shnong bad palat 26,000 ngut ki nongshong shnong ki la shah ktah haduh mynta.
Ki briew kiba la khlad na ka daw ka jinglynshop ki bor mariang naduh ba la bteng ka jingjur slap ki long 12 ngut haduh mynta ha baroh kawei ka Jylla, katba kiba dang jah rngai ki don 2 ngut.
Ki mrad kiba la ïap na ka jingshah rong ha ka um, jingshlei um bad shahtied ’leilieh ki long 32 tylli.
Ki jingtei jingshna kynthup ki surok kiba la twa bad jur ka jingjulor namar ka jingjur slap ki long 36 tylli.
Katkum ka jingbatai lypa ka tnat ba peit thuh ïa ka jinglong jingman ka suiñbneng, la ong ba ka jinghap u slap bajur kan dang bteng ha kiba bun ki jaka ha East Khasi Hills district ha kine ki 24 kynta ban wan.
Namar ka jingbteng ban hap slap, ka pung Umïam ruh kaba la duna um shaba palat tat haduh ka taïew banyngkong jong u Jylliew, mynta ka la dap da ka um. Lada bteng ka jinghap slap, ki bor ba dei peit kin sa pynbna ban pyllait noh teng ïa ka um na kane ka pung.
