Shillong, Naitung 02:
U Bah Amazing Kurbah u la pynpaw ba um don jingsngewpher lada ki paidbah ki ai jingkynthoh haba u shad bad ka puron ha kine khyndiat sngi namar um dei u MLA ne MDC, hynrei u dei tang u nongïalap ban pynsngewthuh ïa ki paidbah ha ka por ilekshon.
Kane ka jingpynpaw u Bah Amazing ka dei hadien ba u la dep shad bad ka puron na Nongstoiñ kaba ki paidbah ki tip ha YouTube kum ka Moi katba ka kyrteng trai ka dei Daphilin Mary Lyngdoh Nonglait kaba la wan ai jingkyrshan ïa ka phlim ‘Khohwah Nongsor’ ha ka sngi sdang pyni ha Bijou Cinema jong ka 30 tarik Jylliew, 2023.
Ha kane ka sngi ynda u Bah Amazing u la poi ha Bijou Cinema, ka Moi kaba la ap baroh shisngi hynrei mar shu poi u Bah Amazing ka la wer ban shad. Kane ka ‘video’ ka la saphriang kylleng namar ki paidbah ki la peit lut baroh ha rynsan social media.
“Ka jingkwah shad i Moi nga hap ban pdiang namar kumba nga ai mynsiem ïa ki samla kiba dang khie san ka long kumba pynshlur ïa ki ha kane ka kam ak phlim” u la ong.
U la ïathuh ba u la ïoh ban shad nyngkong dei bad ka Sherilin Khongwar ha ka por ba pyllait ïa ka ‘trailer’ jong ka phlim ‘Khohwah Nongsor’ bad kane ka long ruh kumba pynkhreh haba u mut ban ak ha ka phlim ‘Raieh’ kaba la ringdur da u Bah Kitrina Nongrum.
Shuh shuh u la ong ïa u briew uba shah kynnoh um dei u briew uba sniew bad ïa u briew uba ïaroh ruh um dei uba bha.
Kumta u don jingkyrmen ba shisien ka sngi ki phlim Khasi kin sa kiew ha kane ka laiñ da ka jingkyrshan ki paidbah hapoh ka jylla.
Ha kane ka sngi la wan ban ai jingkyrshan da ki tyngshop ki puron naduh ka Dora Kurbah, Marangbah, Daniel Nongrum, Aba Nongkhlaw kynthup ïa kiba ak ha kane ka phlim naduh u Sam, Micky, Barisha Mawlong, Sunday Salahe, Jimmy Wann.
