Shillong, Naitung 02:
U MLA ka BJP na South Shillong konstitwensi, Bah Sanbor Shullai um kwah ban ong eiei halor ka jingïatreilang ka NPP bad ka Congress ha Khasi Hills Autonomous District Council (KHADC) namar ka BJP kam don MDC ha katei ka Council.
U Bah Sanbor u la ong ba ka BJP kam don MDC ha KHADC, dei na kata daw kam kwah ban ai kano-kano ka jingkynthoh halor katei ka jingïatreilang hapdeng kitei ar tylli ki seng saiñpyrthei.
Haba kylli kane ka jingïatreilang ka NPP bad Congress kan buh ne em ïa ka jingma ïa ka BJP ban shah weng ha kano kano ka por lada kine ki seng kin ïatreilang sa ha ka sorkar, u Bah Sanbor u ong ban peit ynda la dei ha kata ka por.
U la ong ba haduh mynta ka Congress ka shong ha ka liang pyrshah ha ïingdorbar thawaiñ, hynrei ïa ka sorkar la ïatreilang da ka NPP bad ka BJP ryngkat ka jingsynroplang kiwei ki seng saiñpyrthei.
Kum ban shu pynkynmaw ka NPP ka la weng jyndat ïa ka jingïatreilang bad ka UDP ha KHADC da kaba leit ïatreilang bad ka Congress ban thaw ïa ka Executive Committee kaba thymmai. Kane ka la pynkyndit thret lut ïa ki paidbah namar ka Congress ha ïingdorbar thawaiñ ha jylla ka shong ha ka liang pyrshah kata ki juh ki briew kiba dei lang ki MLA bad ki MDC.
Hynrei mynta ka UDP kaba ïatreilang bad ka NPP ha ka Sorkar Jylla ha KHADC ka hap ban shong noh ha ka liang pyrshah.
