Imphal, Naitung 02 (UNI):
U Myntri Rangbah ka Manipur, u N. Biren Singh u la leit jngoh ïa ka Kumbi konstitwensi jong ka Bishnupur distrik ha kaba 3 ngut ki briew ki la shah siat ïap ha ki runar kieng atiar Kuki ha ka Sngi U Blei.
Ha kawei ka liang, 2 tylli ki kynhun lehnoh Kuki hapoh ka Suspension of Operation (SoO) ki la pynbna ïa ka rai ban weng noh ïa ka jingïakhih kaba la pyntreikam ha Kangpokpi distrik hadien 54 sngi.
Ha kajuh ka por, ka tnad shipai ka la ïoh ban pyllait im ïa 5 ngut ki samla kiba la shah rahbor ha ki runar Kuki ha ki jingjia bapher-bapher.
Ka United People’s Front (UPF) bad ka Kuki National Organisation (KNO) ki la ong ba ki 2 seng kin pyntikna ruh ban weng noh ïa ki ‘Volunteer’ jong ki na ki jaka ba don jingma ban ïarap wanrah biang ïa ka suk ka saiñ.
Ha ka kyrwoh, ki la kyrpad sha baroh ki kynhun seng ba ïadei bad ka suk ka saiñ bad ki nongshong shnong ka Manipur ban jubab ïa ka jingtyrwa bad ban shim ki lad ki lynti ha ka ban wanrah ïa ka shong suk shong shngaiñ hapoh ka Jylla.
Lai ngut ki ‘Volunteer’ shnong kiba ap pahara ha ka thaiñ ki la shah siat ïap ha ki runar kieng atiar Kuki, ha kawei ka liang kaba la wanrah ka jingïakynad ha katei ka jaka.
Ha ka 29 tarik u Jylliew ruh, 3 ngut ki briew ki la ïap na ka jingthombor ki runar Kuki kaba la ïalam sha ka jingbym shong suk shong shngaiñ hapoh ka Jylla.
Ki paidbah ki la sdang ban ïalum hajan Laingoubi Ching ha kaba ka jingjia ka la jia ha ka Sngi U Blei bad ki la trei minot ban ïoh biang ïa ki met ïap bad ki la pynïap ïa u briew uba siat sha ki.
U Myntri Rangbah ka Jylla, u N. Biren Singh u la wan poi ha katei ka jaka bad ïakren bad ki briew kiba la pynsngew ba ki runar kieng atiar Kuki ki la bteng ka jingsiat na ki jaka lum da kaba pyndonkam ïa ki tiar siat ka juk mynta.
Ha kawei ka liang, ki pulit ki la ong ba 5 ngut ki samla ki la shah rah bor ha ki runar kieng atiar Kuki. Ïa kitei ki samla la ïoh ban pyllait im ha ka Sngi U Blei da ki tnad ïada ri bad la aiti noh sha u Officer-in-Charge, Yaingangpokpi, Imphal East.
